QR Aýyl sharýashylyǵy ministriniń birinshi orynbasary Aidarbek Saparov Úkimet otyrysynda agroónerkásiptik keshendi damytýdyń ulttyq jobasy men 2030 jylǵa deiingi tujyrymdamasy aiasynda parniktik gaz shyǵaryndylaryn azaitý josparlanǵanyn aitty, dep habarlaidy QazAqparat.
«Mal sharýashylyǵynda metan shyǵaryndylaryn azaitý úshin kóń men qus sańǵyryǵyn óńdeitin jabdyqqa 25% investitsiialyq sýbsidiialaý tólene bastady. Ósimdik sharýashylyǵynda kúrish, maqta siiaqty sýdy kóp qajet etetin daqyldardyń alqabyn azaitý úshin egis qurylymyn ártaraptandyrý jalǵasady», - dedi Aidarbek Saparov.
Onyń aitýynsha, zamanaýi tsifrlyq tehnologiialardy engizý, ǵaryshtyq monitoring pen jerdi qashyqtan zondtaý nátijelerin paidalaný tehnologiialary salaǵa dendep enip keledi.
«Agrotehnologiialardy saqtaý úshin qazirgi zamanǵy tuqym sorttary men tyńaitqyshtar, ósimdik qorǵaýǵa arnalǵan biologiialyq quraldar satyp alýǵa da qoldaý kórsetiledi. Bul rette, AÓK damytý tujyrymdamasy sheńberinde organikalyq tyńaitqyshtardy satyp alý kezinde aýyl sharýashylyǵy taýaryn óndirýshilerdiń shyǵyndaryn óteý kózdelmek. Salany tehnikalyq turǵyda jaraqtandyrý úshin aýyl sharýashylyǵy tehnikasyn satyp alýdy, jeńildetilgen lizingti sýbsidiialaý, otandyq aýyl sharýashylyǵy mashinasyn jasaýdy damytý baǵdarlamalaryn aýqymdy iske asyrý jalǵasady», - degen vitse-ministr ylǵal únemdeý sharalaryna toqtaldy.
«Sondai-aq, sý únemdeý tehnologiialaryn engizý, gidromeliorativtik qyzmettiń materialdyq-tehnikalyq bazasyn jaqsartý jáne olardyń qyzmet aimaǵyn keńeitý arqyly sýarmaly eginshilikti damytý boiynsha sharalar qabyldanýda. Bul rette, zamanaýi sýarý júielerin satyp alý qunynyń 50% deiin investitsiialyq sýbsidiialaý qarastyrylǵan», - dep túiindedi Aidarbek Saparov.
