QR Aýyl sharýashylyǵy ministrliginiń Agroónerkásip keshenindegi memlekettik inspektsiia komitetiniń burynǵy tóraǵasy E.T.Ainabekov qyzmetin asyra paidalandy degen kúdikpen aiypty dep tanylyp, 6 jylǵa sottaldy, dep habarlaidy "Ult aqparat".
«2020 jyldyń 13 mamyrynda Nur-Sultan qalasynyń Baiqońyr aýdandyq №2 sotynyń úkimimen QR Aýyl sharýashylyǵy ministrligi Agroónerkásip salasyndaǵy memlekettik inspektsiia komitetiniń burynǵy tóraǵasy E.T.Ainabekov 6 jylǵa bas bostandyǵynan jáne ómir boiy memlekettik qyzmette eńbek etý quqyǵynan aiyryldy. Ol 2017 jyly Jambyl oblysynda ziiandy shegirtkelerdi himiialyq jolmen joiý jumystary boiynsha «Orazaliev» jeke kásibimen negizsiz qosymsha kelisim jasaý arqyly óz qyzmetin asyra paidalandy degen kúdikke ilingen», - dedi Sybailas jemqorlyqqa qarsy is-qimyl agenttiginiń 1-shi departamentiniń aǵa tergeýshisi Daniiar Bekaidarov agenttikte ótken onlain baspasóz máslihatynda.
Sonymen qatar ol «KazTrastKem» JShS-nan qaitarymsyz negizde 4 myń litr ýly himikat talap etip, óz qyzmetin asyra paidalaný, komitettiń vedomstvolyq arnaiy tehnikasyn zańsyz jumysqa tartý kúdigi boiynsha sotqa tartylǵan.
Daniiar Bekaidarovtyń aitýynsha E.T. Ainabekovtyń áreketinen memleket pen zańdy tulǵalarǵa 48 mln teńge shyǵyn keltirilgen.
