Senat tóraǵasy Máýlen Áshimbaev Ulttyq qordan beriletin transfertterdi paidalaný máselesin kóterdi. Biýdjetti naqtylaý aiasynda Ulttyq qordan qosymsha 1,6 trln teńge bólinedi, dep habarlaidy QazAqparat.
«Másele Ulttyq qor qarajatyn paidalanbaýda emes, paidalaný kerek, mundai jaǵdaida bolmasa, endi qashan qoldanamyz? Qazirgi jaǵdai ońaiǵa soǵyp turǵan joq. Mundaǵy másele - Ulttyq qor qarjysyn utymdy ári tiimdi paidalaný qajet, olardan qaitarym bolýy kerek», - dedi Máýlen Áshimbaev Senattyń jalpy otyrysynda.
Mysal retinde Senat spikeri ótken jyly Ulttyq qor nysanaly transfertinen alynǵan qarajat qaida jumsalǵanyn aitty.
«Buqaralyq jáne ulttyq sport túrlerin damytýǵa 1,7 mlrd teńge bólinipti. Bul somanyń jartysyna jýyǵy paidalanylmai qaldy. Oǵan qosa, ulttyq filmderdi qoldaýǵa jáne ilgeriletýge 3,3 mlrd teńge bólindi. Onyń tek 34%-y ǵana jumsalǵan. Nege qarajat bólindi? Bólingen eken, nege qoldanylmady?», - dedi Áshimbaev.
Senat tóraǵasy qazirgi shyǵyndardy Ulttyq qordan emes, respýblikalyq biýdjetten qarjylandyrý kerek dep esepteidi.
«Jalpy Ulttyq qordan qarajat bólý qanshalyqty durys? Ulttyq qor transfertterine tiispei, qazirgi shyǵystardy ózge de túsimder esebinen, respýblikalyq biýdjet kiristerinen qarjylandyrýǵa bolatyn shyǵar. Osyǵan bailanysty Úkimet pen depýtattarǵa qor qarajatyn paidalaný tártibi kerek siiaqty. Qajet bolsa, erejelerdi kúsheitip, qatańdatýǵa bolady. Bul baǵytta Úkimettiń belsendi jumysyna úmit artamyz jáne Ulttyq qor máselesi esep kúiinde qabyldanatyn bolady», - dedi Áshimbaev.
Aita keteiik, búgin Senat otyrysynda depýtattar «Qazaqstan Respýblikasynyń Ulttyq qorynan 2022–2024 jyldarǵa arnalǵan kepildendirilgen transfert týraly» QR Zańyna ózgeris engizý týraly» jáne «2022–2024 jyldarǵa arnalǵan respýblikalyq biýdjet týraly» QR zańyna ózgerister men tolyqtyrýlar engizý týraly» zańdardy qarap, maquldady.
Bul túzetýler aiasynda sáýir aiynan bastap zeinetaqy men áleýmettik tólemder qosymsha 4 paiyzǵa artady. Jalpy zeinetaqynyń ortasha mólsheri ótken jylmen salystyrǵanda 11 paiyzǵa ósedi.
