Parlament Senatynyń tóraǵasy Máýlen Áshimbaev Ózbekstannyń Qazaqstan Respýblikasyndaǵy Tótenshe jáne Ókiletti Elshisi Saidikram Niiazhodjaevpen kezdesti, dep habarlaidy "Ult aqparat" Senattyń baspasóz qyzmetine silteme jasap.
Júzdesýshiler parlamentaralyq bailanystardy, sondai-aq ekonomikalyq jáne mádeni-gýmanitarlyq yntymaqtastyqty odan ári nyǵaitý máselelerin talqylady.
«Ózbekstan - Qazaqstannyń Ortalyq Aziia óńirindegi negizgi saýda seriktesi. Biz memleketter basshylarynyń saýda-ekonomikalyq jáne shekara mańyndaǵy yntymaqtastyq bailanystary jónindegi kelisimderine zor mańyz beremiz. Sonymen qatar mádeni-gýmanitarlyq, áleýmettik jáne basqa salalardaǵy ózara tiimdi is-qimyl qarqyndy damyp keledi», - dep atap ótti Máýlen Áshimbaev.
Senat tóraǵasy Májilis pen máslihatyń biylǵy 10 qańtarda ótken sailaýyn baiqaýǵa ózbek tarapynyń belsendi qatysqany úshin Saidikram Niiazhodjaevqa alǵysyn bildirdi, sondai-aq osy sharanyń eldi odan ári damytýdaǵy mańyzyna toqtaldy.
«Sailaý naýqany bastalǵanǵa deiin Prezidenttiń bastamasymen saiasi reformalar toptamasy qabyldandy. Ol jańarýlar bizdiń elimizdiń saiasi júiesin odan ári jańǵyrtýǵa baǵyttalǵan bolatyn. Ony iske asyrý úshin Parlament saiasi partiialar jáne sailaý týraly zańnamaǵa tiisti ózgerister engizdi. Parlamenttiń VII shaqyrylymynyń ashylýynda Memleket basshysy áleýmettik, ekonomikalyq jáne saiasi salalardy damytý jónindegi jańa bastamalardy jariia etti», - dedi Máýlen Áshimbaev.
Senat tóraǵasy Qazaqstan men Ózbekstannyń barlyq salalardaǵy qarym-qatynasy joǵary qarqynmen damyp kele jatqany baiqalyp otyrǵanyn atap ótti. Sondai-aq búkil Ortalyq Aziia óńiriniń tabysty ekonomikalyq damýy, turaqtylyǵy men qaýipsizdigi negizinen Qazaqstan men Ózbekstannyń ózara tyǵyz ári kelisilgen is-qimylyna bailanysty ekeni aityldy.
Máýlen Áshimbaev sondai-aq senatorlar biyl Qazaqstan men Ózbekstan arasyndaǵy parlamentaralyq yntymaqtastyqty nyǵaitýda belsendi jumys isteýdi josparlap otyrǵanyna toqtaldy.
