«Nur Otan» partiiasy Tóraǵasynyń birinshi orynbasary Máýlen Áshimbaev elimizdiń birqatar óńirinde 1 mamyr kúni ótken zańsyz sherýlerge qatysty pikir bildirdi, dep habarlaidy QazAqparat tilshisi.
«Nur-Sultan, Almaty jáne ózge de birqatar qalada ótken sherýlerdegi jaǵdai birkelki. Bizdiń azamattarymyzdyń pikir aitý, jinalý quqyǵy bar. Biraq, munyń barlyǵy da elimizdiń zańnamasyna sáikes oryn alýy tiis. Eger mundai jait bolmasa, biz zańda ustanbasaq, belgilengen erejelerge boisunbasaq, onda munyń búkil qoǵam úshin teris saldary bolady», - dedi Máýlen Áshimbaev OSK-degi brifing barysynda BAQ ókilderiniń saýalyna orai.
Sonymen qatar ol Almatydaǵy marafon barysyndaǵy aktsiiaǵa qatysty da pikirin bildirdi.
«Almatydaǵy marafon barysynda birneshe jastyń júzege asyrǵan aktsiiasyna qatysty máseleniń eki jaǵy bar ekendigin atap ótkim keledi. Mazmundyq jáne ótkizý jaǵy bar. Mazmundyq jaǵynan keler bolsaq, jastar elimizdiń zańnamasyna, halyqaralyq normalarǵa sáikes ashyq, ádil sailaý ótkizýdi jaqtaityn bolsa, onda bul bizdiń partiiamyzdyń jaqtap otyrǵan ustanymy», - dedi ol.
Máýlen Áshimbaev Prezidenttiń bul sailaýdy ashyq, ádil jáne elimizdiń zańnamasyna sai ótkizý týraly tapsyrmasy bar ekendigin eske saldy.
«Sol sebepti mazmundyq jaǵynan keler bolsaq, sailaýdyń ádil ótýine qarsy bolatyn adamdar joq deýge bolady. Adamdardyń qatysýymen, kóptegen qala turǵyndarynyń qatysýymen ótip jatqan ózge shara barysynda jasalǵan mundai áreketter, taǵy da qaitalap aitamyn, Qazaqstan zańyna sáikes júzege asyrylýy tiis. Eger biz ony ustanbasaq, onda bul destrýktivti tendentsiianyń kúsheiýine alyp keledi. Eldegi belgili bir teris tendentsiia kúsheie túsedi. Al bul eshkimge qajet emes», - dedi Máýlen Áshimbaev.
