Memleket basshysynyń tapsyrmasymen «Nur Otan» partiiasynyń janynan qurylǵan Balalar quqyǵyn qorǵaý jónindegi respýblikalyq keńes jumysynyń alǵashqy nátijeleri belgili boldy, dep habarlaidy Baq.kz agenttigi.
Búgin Ortalyq kommýnikatsiialar qyzmetinde ótken brifingte partiia Tóraǵasynyń Birinshi orynbasary Máýlen Áshimbaev osy baǵyttaǵy bastamalarǵa toqtalyp, Keńes aiasynda jumysyn bastaǵan Biryńǵai áleýmettik tereze júiesi men muqtaj azamattarǵa kómek kórsetýdi jetildirýdiń tiimdi tetikteri týraly aitty. Sondai-aq ol balalar quqyǵyn qorǵaý máselesinde memlekettik organdardyń, úkimettik emes uiymdardyń jáne eriktilerdiń qyzmetin úilestirýdegi partiianyń róline nazar aýdardy.
Is-shara barysynda Máýlen Áshimbaev elimizde Prezident tapsyrmasymen áleýmettik salany damytý maqsatynda aýqymdy jumystar atqarylyp jatqanyn aitty. Sonymen qatar ol halyqqa kórsetilip kele jatqan memlekettik áleýmettik kómek túrlerine nazar aýdardy.
– Elbasynyń tapsyrmasymen memleket tarapynan qoǵamdaǵy áleýmettik máselelerdi oń sheshýge baǵyttalǵan aýqymdy jumystar atqarylýda. Memleket basshysynyń bes áleýmettik bastamasy men sońǵy Joldaýynda da halyqtyń ál-aýqatyn jaqsartyp, turmys sapasyn arttyrýǵa basymdyq berilgeni belgili. Atap aitqanda, Joldaýda Elbasy baspananyń qoljetimdiligin qamtamasyz etý, tarifterdi shekteý, eń tómengi jalaqy kólemin ósirý, meditsinalyq qyzmet sapasyn arttyrý jáne taǵy basqa da naqty máselelerge nazar aýdaryp, tiisti tapsyrmalar berdi. Búginde sol baǵyttar boiynsha memlekettik organdar júieli jumys júrgizýde, – dedi Máýlen Áshimbaev.
Sonymen qatar búginde kóp balaly otbasylarǵa qoldaý kórsetý isinde de aitarlyqtai jumys istelgenine nazar aýdarǵan partiia Tóraǵasynyń Birinshi orynbasary ótken jyly tek respýblikalyq biýdjet pen Áleýmettik saqtandyrý qorynan balalary bar otbasylarǵa qoldaý kórsetý úshin 311 mlrd. teńge bólingenin tilge tiek etti.
Memlekettik qoldaýdyń tek áleýmettik járdemaqylarmen shektelmeitinin aitqan Máýlen Áshimbaev basqa da naqty kómekterge toqtalyp ótti.
– Muqtaj jandarǵa jergilikti atqarýshy organdar tarapynan da aitarlyqtai áleýmettik kómekter kórsetilip keledi. Máselen óńirlerde turǵyn úi tólemderi, eseptegish quraldaryn ornatý tólemderi, mektepterde balalardy ystyq tamaqpen qamtamasyz etý, az qamtylǵan otbasylar úshin balabaqshamen qamtýǵa bailanysty tólemder siiaqty naqty qoldaýlar bar, – degen partiia Tóraǵasynyń Birinshi orynbasary mundai áleýmettik kómekter aldaǵy ýaqytta da jalǵasatynyn jetkizdi.
Shyn máninde osyndai irgeli isterge qarap, memlekettiń bul salada aitarlyqtai jumystar atqarǵanyn ańǵarý qiyn emes. Soǵan qaramastan Elbasynyń Úkimetke kóp balaly, az qamtylǵan otbasylar men qiyn jaǵdaiǵa tap bolǵan azamattarǵa qoldaý kórsetýdiń jańa múmkindikterin qarastyryp, áleýmettik salanyń odan ári jaqsartýdy tapsyrǵany belgili. Sol maqsatta arnaiy jumys toby da quryl. Premer-Ministrdiń orynbasary Erbolat Dosaev jetekshilik etetin sol jumys tobynda «Nur Otan» partiiasynyń da ókilderi bar.
Osy rette Máýlen Áshimbaev memlekettiń múmkindigi shekteýsiz emes ekenin erekshe atap ótti.
– Aldymen memlekettiń naqty múmkindigine nazar aýdarýymyz kerek. Óitkeni respýblikalyq biýdjettiń múmkindigi shekteýsiz emes. Onyń ústine, kóp balaly otbasylarmen birge qoldaýǵa muqtaj basqa da áleýmettik toptar bar. Mysaly, múmkindigi shekteýli jandar, bala tárbielep otyrǵan tolyq emes otbasylar, jumyssyz, joǵary bilimsiz jastar, jalǵyzbasty qariialar da memlekettiń qoldaýyna muqtaj. Sondyqtan kóp balaly otbasylarǵa qoldaý kórsetýdiń basqa da tiimdi joldaryn qarastyrýymyz qajet. Iaǵni tek áleýmettik járdemaqymen shektelmeý kerek. Ol qoldaýdyń tek bir bóligi ǵana, – degen Máýlen Áshimbaev odan basqa da ortalyq jáne jergilikti atqarýshy organdar arqyly júzege asyrylatyn túrli tetikterge kóńil bóldi.
.jpeg)