Memleket basshysy Qasym-Jomart Toqaevtyń tapsyrmasymen Parlament Senatynyń Tóraǵasy Máýlen Áshimbaev Ulybritaniia jáne Soltústik Irlandiia Qurama Koroldiginiń Patshaiymy II Elizavetany memlekettik jerleý rásimine qatysty. Atalǵan rásim 18-19 qyrkúiek kúnderi London qalasynda ótti, dep habarlaidy "Ult aqparat" joǵarǵy palatanyń baspasóz qyzmetine silteme jasap.
"Senat Spikeri 18 qyrkúiekte Vestminster hollynda Patshaiymnyń tabytyn ziiarat etý rásimine qatysyp, Qazaqstan Respýblikasynyń atynan resmi kóńil aitý kitabyna jazba qaldyrdy. Ol II Elizaveta asa kórnekti kóshbasshy jáne britan ultynyń birligi men turaqtylyǵynyń simvoly bolǵanyn, aldaǵy ýaqytta da Patshaiymnyń tektiligi, qadir-qasieti men jetistikteri álemdegi milliondaǵan adamdy jigerlendire beretinin atap ótti" - delingen habarlamada.
Sol kúni Máýlen Áshimbaev Býkingem saraiynda Korol III Charlzdiń Eýropa, Taiaý Shyǵys jáne Aziia elderiniń, úkimetter men halyqaralyq uiymdardyń basshylarynyń jáne koroldik otbasy músheleriniń qurmetine arnalǵan qaraly qabyldaýyna qatysqan.
Senat Tóraǵasy Korol III Charlzben suhbat barysynda Memleket basshysynyń atynan kóńil aityp, el Prezidentiniń sheshimi boiynsha jaqyn arada Astananyń ortalyq saiabaǵyndaǵy gúlzarlardyń birine II Elizaveta Patshaiymnyń esimi beriletinin jetkizgen.
"Ulybritaniia monarhy murager hanzada retinde 1996 jyly Qazaqstanǵa jasaǵan saparyn eske aldy. Sondai-aq Korol Patshaiymnyń qazasyna bailanysty yqylas tanytqany úshin rizashylyǵyn bildirip, Qazaqstan basshylyǵy men halqyna igi tilekteri men iltipatyn jetkizdi" - deidi baspasóz qyzmeti ókilderi.
Vedomstvo málimetinshe, qazaqstandyq delegatsiia 19 qyrkúiekte Vestminster abbattyǵynda ótken II Elizaveta Patshaiymdy jerleý rásimine qatysty. Bizdiń el delegatsiiasynyń quramynda Syrtqy ister ministriniń orynbasary Roman Vasilenkonyń boldy.
Rásimge 2000-ǵa jýyq meiman qatysqan. Olardyń qatarynda koroldik otbasynyń músheleri, memleket jáne úkimet basshylary, diplomattar men qoǵam ókilderi bar.
Aita keteiik, buǵan deiin Qazaqstan Prezidenti Qasym-Jomart Toqaev Korol III Charlzge kóńil aitý jedelhatyn joldady. Onda Memleket basshysy Qazaqstan halqynyń jáne jeke óziniń atynan Koroldiń, koroldik otbasy men barlyq britandyqtyń qaiǵysyna ortaqtasyp, kóńil aitty. Sondai-aq el Prezidenti Ulybritaniianyń Qazaqstandaǵy elshiligine baryp, kóńil aitý kitabyna jazba qaldyrdy.
