Búgin «Nur Otan» partiiasy Tóraǵasynyń Birinshi orynbasary Máýlen Áshimbaevtyń tóraǵalyǵymen partiia Saiasi keńesiniń otyrysy ótti.
Oǵan Saiasi keńes músheleri, sonyń ishinde Qazaqstan Respýblikasy Parlamentiniń depýtattary, atqarýshy memlekettik organdardyń jáne úkimettik emes uiymdardyń basshylary, kásipkerler, dárigerler, bilim, mádeniet, sport salasynyń ókilderi, Qazaqstan halqy Assambleiasynyń músheleri jáne taǵy basqalar qatysty. Sondai-aq otyrysqa partiianyń kezekten tys XIX seziniń delegattary da shaqyryldy.
Is-shara barysynda atalǵan sezdiń qaraýyna shyǵarylatyn Qazaqstan Respýblikasynyń Prezidenttigine «Nur Otan» partiiasynan kandidat usyný týraly másele talqylanyp, sezdiń jumys organdarynyń quramy pysyqtaldy. Otyrysty ashqan Máýlen Áshimbaev qazirgi tańda elimizdiń asa mańyzdy tarihi kezeńdi bastan ótkerip jatqanyna nazar aýdardy.
– Aldymyzda úlken saiasi naýqan – Prezident sailaýy tur. Elbasymyzdyń tapsyrmasyna sáikes bul sailaýǵa bizdiń partiiamyz da belsendi túrde qatysady. Soǵan bailanysty erteń Elbasy, partiia Tóraǵasynyń qatysýymen partiianyń kezekten tys XIX sezin ótkizip, aldaǵy sailaýǵa qatysatyn kandidatymyzdy usynamyz, – dedi Máýlen Áshimbaev.
Sondai-aq ol Qazaqstannyń Tuńǵysh Prezidenti – Elbasy, partiia Tóraǵasynyń abyroi-bedeli men dana basshylyǵynyń arqasynda «Nur Otan» partiiasynyń 20 jyldyń ishinde elimizdegi músheleri eń kóp, jetekshi saiasi kúshke ainalǵanyn aityp ótti. Sondyqtan partiianyń aldaǵy negizgi mindeti Elbasy saiasatyn ári qarai jalǵastyrý, soǵan basty kepil bolý jáne Tuńǵysh Prezidentimiz anyqtap bergen barlyq strategiialyq maqsattarǵa qol jetkizý bolyp qala bermek.
– «Nur Otan» Elbasy anyqtap bergen elimiz úshin mańyzdy qundylyqtar – táýelsizdik, jalpyulttyq birlik, básekege qabiletti qýatty ekonomika, bilimdi órkendegen qoǵam jáne búkil álem moiyndaǵan bedeldi memleket qurý siiaqty basymdyqtardy saqtaidy. Osy maqsattarǵa qol jetkizý úshin partiianyń uzaqmerzimdi saiasi kóshbasshylyǵyn saqtap, ony ári qarai nyǵaitý kerek. Bul – bizge júktelgen úlken jaýapkershilik, – dedi partiia Tóraǵasynyń Birinshi orynbasary.
Sonymen qatar Máýlen Áshimbaev Prezident sailaýyna qatysatyn nurotandyq kandidattyń esimin erteńgi sezde Elbasy aitatynyna da kóńil bóldi.
– Qazaqstannyń Tuńǵysh Prezidentiniń usynysymen bizdiń partiiamyzdan el prezidenttigine kandidat usyný bilik sabaqtastyǵynyń mańyzdy faktory bolyp sanalady jáne «Nur Otan» partiiasynyń Elbasy saiasatyn tolyǵymen ári qarai jalǵastyratynyn kórsetedi, – dedi «Nur Otan» partiiasy Tóraǵasynyń Birinshi orynbasary.
Partiia Jarǵysynyń 9.1-tarmaǵyna sáikes Qazaqstan Respýblikasynyń Prezidenttigine partiia atynan kandidat usyný tek partiianyń joǵary basshylyq organy – Sezdiń sheshimimen júzege asyrylady. Osyǵan orai atalǵan máseleni sezdiń kún tártibine shyǵarý jóninde partiia Saiasi keńesiniń músheleri: Parlament Senatynyń depýtaty Asqar Beisenbaev, partiianyń «Sokolov-Sarybai taý-ken baiytý óndiristik birlestigi» filialy tóraǵasynyń birinshi orynbasary Aleksandr Makarenko jáne «G38» jas kóshbasshylar qory» qoǵamdyq qorynyń jetekshisi Aisulý Erniiazova sóz sóilep, bul jaittyń mańyzy týraly aitty. Sonyń nátijesinde partiia Saiasi keńesiniń músheleri Qazaqstan Respýblikasynyń Prezidenttigine kandidat usyný týraly máseleni partiianyń XIX seziniń qaraýyna engizý týraly usynysty qoldap, kóterilgen másele boiynsha Saiasi keńestiń Qaýlysy qabyldandy. Odan bólek, otyrysta kezekten tys XIX Sezdiń jumys organdary – Mandat, Esep, Redaktsiia komissiialarynyń jáne Sezd Hatshylyǵynyń jeke quramdary qaralyp, usynyldy.
Jiyn sońynda partiia Tóraǵasynyń Birinshi orynbasary erteńgi Sezdiń el damýy úshin mańyzy zor ekenin taǵy bir márte eske saldy.
– Ózderińiz kórip otyrǵandai, Sezdiń qaraýyna elimizdiń ári qarai damýy úshin óte mańyzdy máseleler shyǵarylyp otyr. Sondyqtan aldaǵy úlken is-sharalardyń abyroimen ótýine barshamyz bir kisidei atsalysaiyq, – dedi Máýlen Áshimbaev.
Aita ketek, saiasi keńes - partiianyń joǵary ókildik organy. Onyń ókilettigine partiia Seziniń sheshimderin oryndaý boiynsha partiia organdary qyzmetiniń negizgi baǵyttaryn anyqtaý, partiianyń qatysýymen bolatyn sailaý kampaniialaryna qatysty máselelerdi qaraý, partiia atynan saiasi málimdemeler men úndeýlerdi qaraý jáne engizý, qalyptasqan qoǵamdyq qatynasqa bailanysty partiianyń ustanymyn anyqtaý, partiia Tóraǵasynyń usynysy boiynsha óz quramynan partiia Saiasi keńesiniń Biýro múshelerin sailaý, partiia Sezin shaqyrý, olardyń kún tártibin qalyptastyrý, partiiaishilik talqylaýlardy ótkizý týraly sheshim qabyldaý, olardy ótkizýdi uiymdastyrý jáne qorytyndylaý, partiia seziniń erekshe quziretine qatysy joq partiia qyzmetindegi basqa da máselelerdi sheshý kiredi. Partiia Saiasi keńesiniń ókilettik merzimi – 4 jyl.
