Senat Tóraǵasy Máýlen Áshimbaev Qazaqstanda jumys isteitin diplomatiialyq korpýstyń jáne halyqaralyq uiymdardyń ókilderimen kezdesti, dep habarlaidy "Ult aqparat".
Senat spikeri aldymen, joǵary palatanyń biylǵy sessiiadaǵy zań shyǵarý qyzmeti eki negizgi mindetke baǵyttalǵanyn atap ótti. Olardyń biri koronavirýs pandemiiasymen kúres jumystary jáne indettiń áleýmettik-ekonomikalyq saldaryn eńserý bolsa, ekinshisi – Memleket basshysynyń bastamasymen qolǵa alynǵan keshendi reformalardy iske asyrýdy quqyqtyq turǵydan qamtamasyz etý. Sondai-aq, Máýlen Áshimbaev óz sózinde pandemiia kezeńinde azamattar men biznesti qoldaý maqsatymen qabyldanǵan mańyzdy zańdarǵa toqtaldy.
«Qazaqstanda azamattarymyzdy qorǵaýǵa jáne ekonomikamyzdy qoldaýǵa arnalǵan daǵdarysqa qarsy aýqymdy sharalar qabyldandy. Byltyr osy maqsatqa 14 mlrd dollardan astam qarajat nemese jalpy ishki ónimniń 9 paiyzy bólindi. Daǵdarysqa qarsy zańdar jedel qabyldanyp otyrdy. Olardyń qatarynda biýdjetke, Salyq kodeksine túzetýler engizý, biznes pen investorlardy qoldaý máseleleri týraly, meditsina qyzmetkerlerine qoldaý kórsetý týraly jáne taǵy basqa zańdar bar», – dedi Senat spikeri.
Sonymen qatar ol el Prezidentiniń bastamasymen qolǵa alynǵan júieli reformalardyń iske asyrylýyn zańnamalyq turǵydan qamtamasyz etý jolyndaǵy Parlamenttiń qyzmeti týraly sóz qozǵady.
«Memleket basshysynyń elimizdi jańǵyrtý baǵdarynda aldaǵy maqsat-mindetter naqtylanǵan. Olar – eń aldymen, saiasi júieni demokratiialandyrý, onyń teńgerimdiligin qamtamasyz etý, saiasi básekelestikti arttyrý, azamattardyń quqyqtaryn iske asyrý úshin laiyqty jaǵdai jasaý jáne taǵy basqalary», – dedi Máýlen Áshimbaev.
Senat Tóraǵasy el Prezidentiniń jańǵyrtý baǵdaryndaǵy kelesi basymdyqtar memlekettik basqarýdyń tiimdiligin arttyrý, memlekettik organdardyń halyqqa ashyq bolýy qamtamasyz etý jáne jumys barysynda azamattardyń pikirlerin eskerý ekenin aitty. Mundai tásilderdiń negizi «Halyq únine qulaq asatyn memleket» tujyrymdamasynda naqty kórsetilgen.
«Qazaqstan Prezidentiniń áleýmettik saladaǵy reformalary ádil, inkliýzivti áleýmettik saiasatty iske asyrýǵa, bilim berý jáne densaýlyq saqtaý salalaryn jańǵyrtýǵa baǵyttalǵan. Biz ár azamat óz múmkindigin iske asyrýyna jáne kómekke muqtaj jandardyń nazardan tys qalmaýyna basa mán beremiz», – dedi Máýlen Áshimbaev.
