QR Parlamenti Senatynyń tóraǵasy Máýlen Áshimbaev Senat janyndaǵy Jas sarapshylar klýbynyń kezekti otyrysyn ótkizdi. Onda qazaqstandyq bilim jáne ǵylym máseleleri talqylandy, dep habarlaidy "Ult aqparat".
Senat tóraǵasy kezdesýdi asha kelip, atalǵan taqyryptyń mańyzdylyǵyn atap ótti jáne osy salany damytýdaǵy keibir trendterge toqtaldy.
«Qazaqstannyń bilim jáne ǵylym júiesiniń qalyptasýy men damýy bizdiń memleketimizde árqashan basymdyqtardyń biri bolyp keledi. Elimiz Prezidentiniń qyrkúiek aiyndaǵy Joldaýynda birqatar mańyzdy tapsyrma alǵa qoiyldy. Jalpy alǵanda, elimizdi jańǵyrtý baǵdarlamalary aiasynda osy salaǵa basa nazar aýdarylyp otyr», - dedi Máýlen Áshimbaev.
Senat tóraǵasy COVID-19 bilim berý júiesiniń jumysynyń qyzmetine eleýli problemalar týyndatqanyn atap ótti. Sonymen birge, pandemiia oqytýda jańa ádisterdi engizý múmkindigi men engizý kerektigin, al qashyqtan bilim berý áleýetin keńinen qoldaný kerek ekenin kórsetip otyr.
M. Áshimbaev sondai-aq bilim berý salasyndaǵy álemniń barlyq elderine tán mazmundy ózgeristerge toqtaldy.
Is-sharaǵa QR Bilim jáne ǵylym ministri Ashat Aimaǵambetov qatysty. Ol salalyq mekemede atqarylyp jatqan jumystar men Memleket basshysynyń bilim berý júiesin reformalaý jónindegi tapsyrmalarynyń oryndalýy týraly aityp berdi.
«Biz jańa álemde, jańa jaǵdaida ómir súrip jatyrmyz. Bilim berý júiesi de oǵan beiimdelýi kerek. Másele jańa reformalar júrgizý emes. Bizge barlyq ózgeristerdiń tiimdi bolǵany, qazaqstandyqtardyń bilim deńgeii arta túskeni, ýaqyt talabyna sáikes keletin quzyretterdi qalyptastyrýǵa jaǵdai jasalǵany mańyzdy», - dep atap ótti ministr.
Senat baspasóz qyzmetiniń málimetinshe, jas sarapshylar klýbynyń otyrysy barysynda pikirtalasqa qatysýshylar qazaqstandyq bilim men ǵylymnyń ózekti máseleleri boiynsha óz pikirlerin ortaǵa saldy.
Youth Corps Projecttegi monitoring jáne baǵalaý jónindegi sarapshy, áleýmettanýshy Kamila Koviazina orta bilim berýdiń jańartylǵan mazmunyna kóshý aiasynda muǵalimderdiń biliktiligin arttyrý máseleleri týraly aityp berdi.
Prezidenttik jastar kadrlyq rezerviniń múshesi, saiasattanýshy Indira Rystina joǵary jáne joǵary oqý ornynan keiingi bilim berý máselelerine toqtaldy.
Kzhol qaiyrymdylyq qorynyń qamqorshylyq keńesiniń múshesi Diana Erlan erekshe qajettiligi bar balalarǵa arnalǵan bilim berý salasyn damytý jónindegi óz usynystaryn ortaǵa saldy. Al Ulttyq biotehnologiia ortalyǵynyń adam genetikasy zerthanasynyń meńgerýshisi Maqsat Jabaǵin Qazaqstanda ǵylymi kadrlar daiarlaýdaǵy ózekti máselelerdi atap ótti.
