Prezident Joldaýy aiasynda Parlamentke úlken mindet pen jaýapkershilik júktelip otyr. Bul týraly Senat tóraǵasy Máýlen Áshimbaev málim etti, dep habarlaidy QazAqparat tilshisi.
«Keshe Memleket basshysy Qasym-Jomart Kemeluly Toqaev Qazaqstan halqyna arnaǵan Joldaýyn jariialady. Bul Joldaýdyń burynǵylardan máni de, mańyzy da airyqsha boldy. Onda Jańa Qazaqstan qurýdyń jáne jańarý men jańǵyrýdyń basym baǵyttary naqty aityldy. Prezidentimiz Joldaýda elimizdiń saiasi júiesin keshendi jańǵyrtý baǵdarlamasyn usyndy. Soǵan sáikes kóptegen mańyzdy saiasi reformalar men tyń bastamalar týraly sóz boldy.
Sonyń ishinde Parlamenttiń rólin kúsheitý kerektigi de aityldy.
Mundai qadam jańarý men jańǵyrý jolynda Parlamentke úlken mindet pen jaýapkershilik júkteidi. Soǵan bailanysty Memleket basshysy Senat pen Májilistiń jumysy men qurylymyna qatysty reformalarǵa toqtaldy. Endi Senattaǵy prezidenttik kvotanyń sany 15-ten 10-ǵa deiin qysqarady», - dedi M. Áshimbaev Senattyń jalpy otyrysynda.
Osy oraida ol óńirlerdiń múddesi eń basty basymdyqtardyń biri bolyp qala beretinin aitty.
«Prezidentimizdiń sheshimimen óńirlerdiń sany kóbeietin boldy. Iaǵni, bizdiń jumysymyzdyń aiasy keńeiedi. Sondyqtan aldaǵy ýaqytta osy baǵyttaǵy maqsat-mindetimiz burynǵydan da arta túsedi. Shyn máninde, Abai, Ulytaý, Jetisý oblystarynyń qurylýy bizdiń ult retinde ósýimizdiń jarqyn kórinisi. Sonymen birge Qazaqstan halqy Assambleiasynyń kvotasy Májilisten Senatqa beriledi. Bul sheshim qoǵamdyq kelisim men yntymaqtastyqty nyǵaitý turǵysynan bizdiń áleýetimizdi arttyratyny sózsiz», - dedi Senat tóraǵasy.
