Abai murasy - otanshyl, adal, parasatty, bilimdi, bilikti urpaq tárbieleýdiń negizi. Mundai pikirdi QR Parlamenti Senatynyń tóraǵasy Máýlen Áshimbaev bildirdi, dep habarlaidy "Ult aqparat".
«Barshańyzdy elimizde alǵash ret resmi túrde atalyp ótip jatqan Abai kúnimen quttyqtaimyn! Bul – qazaq úshin tarihi oqiǵa, zor qýanysh jáne ulttyq qundylyqtardy ulyqtaýdyń jańa belesi, eldik pen egemendiktiń jarqyn kórinisi. Uly oishyldyń 175 jyldyǵynda osyndai derbes kúnniń belgilenýi óte oryndy bastama. Óitkeni sanamyzdy jańǵyrtyp, sapamyzdy arttyrýda Abai eńbekteriniń alar orny erekshe. Sondyqtan bul sheshimdi bas aqynǵa ǵana emes, qazaq ádebieti men mádenietine, bilimi men ǵylymyna, tutas ult rýhaniiatyna kórsetilgen zor qurmet dep qabyldaimyz», - dep jazdy Máýlen Áshimbaev Facebook paraqshasynda.
Onyń paiymynsha, Abai murasy otanshyl, adal, parasatty, bilimdi, bilikti urpaq tárbieleýdiń negizi dep aitsaq ta artyq bolmaidy. Sol sebepti, uly aqynnyń shyǵarmalaryn qazirgi zamannyń talaptary men tetikterin eskere otyryp, keńinen nasihattaǵan jón.
«Osyǵan orai Prezidentimiz Qasym-Jomart Kemeluly Toqaev óziniń «Abai jáne HHI ǵasyrdaǵy Qazaqstan» atty maqalasynda kóptegen ózekti máselelerdi kóterip, utymdy oilaryn ortaǵa salǵanyn jaqsy bilemiz. Memleket basshysy búgin «Egemen Qazaqstan» gazetine jariialanǵan «Abai – rýhani reformator» atty maqalasynda da uly oishyldyń ilimi qazirgi birqatar baǵyttarǵa orailas keletinine nazar aýdaryp, eldi bilim igerýde, tárbie máselesinde, jańa kásip úirenýde jáne yntymaq-birlikte Abaiǵa júginýge shaqyrady. Shyn máninde, ult ustazynyń ulaǵaty – eshqashan mańyzyn da, qundylyǵyn da joǵaltpaityn ónege, óshpes ósiet», - dedi ol.
Senat spikeriniń atap ótýinshe, eń bastysy, aqynnyń eńbekterin dáriptegende naýqanshylyqqa jol bermegen abzal.
«Prezidentimiz aitqandai, ǵulamanyń mereitoiy toi toilaý úshin emes, oi-órisimizdi keńeitip, rýhani damýymyz úshin qajet. Osy turǵydan kelgende búgingi merekeniń mán-mańyzy airyqsha, kótergen júgi aýyr ekenin uǵamyz. Endeshe ultymyzdyń órkeniet órine jasaǵan kezekti qadamy uzaǵynan bolǵai! Uly oishyldyń shyǵarmalary halqyna rýhani qyzmetin jalǵastyra bersin! Abai kúni qutty da qaiyrly bolsyn! Qazaq eli máńgi jasasyn!», - dedi Máýlen Áshimbaev.
Aita keteiik, taiaýda Qazaqstan Respýblikasy Úkimetiniń qaýlysymen 10 tamyz Abai kúni bolyp belgilendi.
