Senat depýtaty Murat Baqtiiaruly Asharshylyq taqyrybyn jan-jaqty zerdeleý úshin ǵalymdardyń otandyq jáne sheteldik muraǵattarǵa qol jetkize alýyn qamtamasyz etý kerektigin málim etti, dep habarlaidy QazAqparat.
Bul máseleni senator Murat Baqtiiaruly elimizdiń Premer-Ministriniń atyna joldaǵan depýtattyq saýalynda kóterdi. Onyń saýaly taiaýda Parlament Senaty, Tarih jáne etnologiia institýty, sondai-aq Memleket tarihy institýty uiymdastyrǵan «Azattyq jolyndaǵy aqtańdaqtar: asharshylyq zardaptaryna shynaiy tarihi kózqaras» taqyrybyna arnalǵan dóńgelek ústelde qabyldanǵan usynymdarǵa negizdeldi.
Senator bolsheviktik ákimshilik júieniń aiaýsyz saiasaty halyqtardyń dástúrli sharýashylyǵyn eskermegenin jáne zorlyq-zombylyq arqyly reformalar júrgizgenin atap ótti. Bul milliondaǵan adamdardyń ómirin qiǵan ashtyqqa ákeldi.
«Qazaq ultynyń birneshe urpaqtarynyń jadynda asharshylyq qurbandarynyń jan azaby jazylmaityn jara bolyp, halyqtyń tarihi-psihologiialyq sanasynda tereń iz qaldyrdy», - dedi Murat Baqtiiaruly.
Senatordyń aitýynsha, el tarihynyń osy qaiǵyly kezeńin jan-jaqty zertteý asa mańyzdy, biraq sonymen birge ǵalymdar aýqymdy aqparat saqtalatyn muraǵattarǵa qol jetkize almai, problemalar týyndap otyr.
«Ashtyq týraly esepter men statistikalyq derekter qýǵyn-súrginge ushyraǵan qazaq ziialylarynyń eńbekteri, korrespondentsiialary týraly materialdar burynǵy qaýipsizdik organdarynyń arhivterine túsip, keiin qaitarylmaǵan. Asharshylyqqa qatysty kóptegen qujattar men qundy materialdar Ulttyq qaýipsizdik komiteti, Bas prokýratýra, Ishki ister ministrlik arhivterinde saqtaýly. Bul málimetter osy kúnge deiin áli qupiia bolǵandyqtan oǵan zertteýshilerdiń kirýi qiyn», - dep atap ótti Murat Baqtiiaruly.
Senator sonymen qatar qolynda naqty deregi joq bolǵandyqtan tarihshylar asharshylyq jyldary ólgen, Qazaqstannan tys jerge aýyp ketken, túrli indetter men juqpaly aýrýlardan kóz jumǵan adamdardyń sany týraly kesimdi nárse aitýǵa bara bermeitinin aitady. Tek jýyqtap ári shamalap aitýǵa ǵana májbúr. Murat Baqtiiaruly osyǵan bailanysty dóńgelek ústel otyrysyna qatysýshylar qabyldaǵan usynystardy eske saldy.
Senat depýtattary muraǵat materialdaryna qol jetkizýdi qamtamasyz etý jáne zertteýler júrgizý, sondai-aq qajet bolǵan jaǵdaida olardan «qupiia» degen belgilerdi alyp tastaý úshin tiisti memlekettik organdarǵa usynystar engizýdi suraidy. Sonymen qatar, depýtattar Qytai, Ózbekstan, Qyrǵyzstan, Túrkimenstan jáne Resei muraǵattarynda asharshylyq týraly ǵylymi zertteýler júrgizý múmkindigin qarastyrýdy suraidy.
Senatorlar sondai-aq jyl saiyn 31 mamyrda memlekettik deńgeide «Aza tutý minýtyn» ótkizýdi, sondai-aq jastardyń sanasynda Asharshylyq qasiretin máńgi este qaldyrý jáne ornyqtyrý úshin «Aza saraiy» memorialdyq keshenin («Aza saraiy») salýdy usyndy.
