Búgin Senatta Memleket basshysynyń tapsyrmasy boiynsha jaryq kórgen «Asharshylyq. Golod. 1928-1934. Derekti hronika» atty jańa eńbek kópshilikke tanystyryldy, dep habarlaidy "Ult aqparat".
Senat spikeri Máýlen Áshimbaevtyń aitýynsha, shara Saiasi qýǵyn-súrgin jáne asharshylyq qurbandaryn eske alý kúni qarsańynda arnaiy uiymdastyrylyp otyr.
«Úsh tomdyq kitapta zobalań jyldarǵa qatysty tyń derekter men tarihi qujattar jinaqtalǵan. Olar asharshylyqtyń alǵysharttary jáne tragediialyq saldary týraly málimetterdi qamtidy. Barlyq qujattar elimizdiń ortalyq jáne óńirlik arhivterinen alyndy. Basqa memleketterdiń arhivterinde saqtalǵan derekter de jinaqqa engizildi. Sonyń nátijesinde buryn qolǵa túsirý qiyn bolyp kelgen jáne buǵan deiin jariialanbaǵan birqatar málimetter kópshilik úshin qoljetimdi bolyp otyr. Jańa týyndy ýniversitetterge, ǵylymi zertteý institýttaryna jáne ortalyq, óńirlik kitaphanalarǵa jiberiledi. Jalpy, asharshylyqtyń zardaby ultymyz úshin óte aýyr bolǵany belgili. Bul baǵytta ashylmaǵan aqiqattar men jazylmaǵan jaittar áli de az emes. Sondyqtan Prezidentimiz osy taqyrypty zertteý týraly naqty tapsyrma bergen edi. Sonyń aiasynda Senat aqpan aiynda aýqymdy dóńgelek ústel ótkizdi. Búgin tanystyrylǵan eńbekti sol is-sharanyń nátijesi jáne Senattyń asharshylyqty zertteýge qosqan naqty úlesi dep aitýǵa bolady» dep jazady Máýlen Áshimbaev Facebook paraqshasynda.
Senat tóraǵasy osy rette bar bolǵany úsh-aq aidyń ishinde myńnan astam arhiv qujattaryn jinap, qundy dúnie daiyndaǵan avtorlardyń eńbegin erekshe atap ótti.
«Eldik múdde jolynda aianbai jumys istegen Berik Ábdiǵaliuly bastaǵan ujymǵa, redaktsiia alqasyna jáne qoldaý kórsetken barsha azamattarǵa rizashylyǵymyzdy bildiremiz. Árine, bul iste bir kitappen shektelip qalýǵa bolmaityny túsinikti. Qujattar men derekterdi ári qarai da jinaqtaý qajet. Sonymen birge jariialanǵan málimetterdiń negizinde jan-jaqty ǵylymi zertteý júrgizý de - mańyzdy maqsattardyń biri. Ol úshin memlekettik organdar tarapynan tiisti qoldaý kórsetile beredi. Sondyqtan aldaǵy ýaqytta bul salada keshendi jáne júieli jumystar jalǵasady dep senemiz. Kópshilikke jol tartqan jańa eńbektiń tarihymyzdyń aqtańdaq betterin ashýǵa, táýelsizdigimizdi nyǵaitýǵa jáne ult sanasyn jańǵyrtýǵa qosar úlesi mol bolsyn!» deidi Máýlen Áshimbaev.
Eske sala keteiik, búgin Senatta Saiasi qýǵyn-súrgin jáne asharshylyq qurbandaryn eske alý kúni qarsańynda «Asharshylyq. Golod. 1928-1934. Derekti hronika» úsh tomdyq jinaǵy tanystyryldy.
Jiynda sóz alǵan Senat tóraǵasy Máýlen Áshimbaev Táýelsizdiktiń 30 jyldyǵy aiasynda osyndai is-sharalardyń mańyzy zor ekenin aitty.
«Táýelsizdigimizdi ulyqtaý sátinde toiǵa emes, oiǵa basymdyq berý, ótkenimizden ónege alý – bizder úshin zor mindet. Memleket basshysy 30 jyldyqty atap ótýge arnalǵan alǵashqy otyrysta osy máselege basa mán berdi. Prezidentimiz aitqandai, egemendiktiń búgingi belesi eldiń jańa kelbeti men ulttyń jańa bolmysyn qalyptastyrýǵa qyzmet etýi kerek. Bul rette, tarihi sanany jańǵyrtatyn jáne bostandyqtyń qadir-qasietin arttyratyn is-sharalar asa mańyzdy», – dedi Máýlen Áshimbaev.
