Asfendiiarov atyndaǵy QazUMÝ-da sheteldik stýdentterdiń shaǵymy qarastyryp, máseleni sheshý joldaryn qarastyratyn komissiia quryldy. Bul týraly kaz.tengrinews.kz tilshisine halyqaralyq meditsina fakýltetiniń dekany Gaýhar Qurmanova aityp berdi.
Qazirgi kezde shetelden kelgen stýdentter óz aryzyn jazbasha tapsyrǵan. Úndistan men Iordaniia azamattary ádiletsiz baǵa qoiýmen qatar, jataqhanada oryn tek birinshi kýrs stýdentterine beriletinine narazy. Onyń ústine JOO ainalasyndaǵy qorshaý alyp tasalǵaly beri stýdentterdi tonaýdyń eki deregi tirkelgen. Birin soqqyǵa jyqsa, ekinshisiniń telefonyn tartyp alǵan.
Viza alýǵa qatysty da shaǵymdar bar eken. Degenmen bul oqý ornynyń emes, tikelei úkimettiń ókilettigindegi sharýa.
Sońǵysy, stýdentterdiń potologiialyq anatomiia, biohimiia jáne fiziologiia kafedrasynyń birneshe oqytýshysyna shaǵymdary bar.
Qurmanovanyń sózinshe, komissiia barlyq shaǵymdy qarastyryp, qajetinshe jumys isteitin bolady. Sonymen birge, oqý ornynyń birneshe másele boiynsha naqty ustanymy bar.
"Biz stýdentterdiń baǵalarǵa qatysty jaýaptaryn jiti qaradyq. Ol jerde jaýap paraqtary bos. Baǵalar laiyqty qoiylǵan. 53 sheteldik stýdent ekilik degen baǵa aldy. Al qazaqsha jáne oryssha oqityn stýdentterde ekilik degen 60 baǵa bar. Al olar úndemeidi, baǵalardyń ádil ekenin biledi. Emtihandar júrip jatyr. Sheteldik stýdentter óz áreketimen qoǵamdyq tártipti buzdy. Olarmen kelisimshartty úzýge bolatyn edi, biraq, ondaiǵa barmaimyz. Taǵy qaitalansa, shara qoldanamyz. Qazir olar jazǵy, aqyly semestrge qalady. Onyń ýaqyty shekteýli emes", - deidi dekan.
Qurmanova jataqhana máselesin oqý orny ózdiginen sheshe almaitynyn aitady.
"Bir kezderi jataqhanalar satylyp ketken, al jańadan salynǵan joq. Qazir Almaty ortalyǵynda jer qymbat, jataqhana salý múmkin emes. Bul iske ministrlik, ákimdik kómektespese. Al ákimdiktiń birinshi amaly - qorshaýdy alǵyzyp tastady. Endi kampýstegi qaýipsizdikke jaýap bere almaimyz. Bul jerde aýrýhana qalashyǵy bar, sondyqtan ótken-ketkender kóp. Al kei sabaqtar tym kesh aiaqtalady", - deidi Gaýhar Qurmanova.
Oqý ornynyń ókilderi oqytýshylarǵa qatysty aryzdarmen kelispedi, ótkeni stýdentterdiń ózine qatysty 140 baianat bar eken.
"Bul dáristerge nemquraily qaraý, sabaqtan qalý, keshigý, daiyndalmaý, aǵylshyn tilin nashar bilý. IELTS 6,5 deńgeii bar oqytýshylarǵa shaǵym jasaidy. Máselen, patologiialyq anatomiiany Almatynyń bas patologoanatomy júrgizedi. Oqytýshylardyń biri Niý-Iork ýniversitetinde jumys istep keldi. Olardyń bári aǵylshyn tilin tamasha biledi, biz olardyń sabaqtaryna qatystyq, stýdentter daiyndyqsyz keledi", - deidi Qurmanova.
Eske salaiyq, 20 maýsymda Iordaniia men Úndistannan kelgen stýdentter Asfendiiarov atyndaǵy QazUMÝ-da narazylyq sharasyn ótkizgen edi. Osyǵan bailanysty 280 oryndyq akt zalynda talqylaý ótkizý usynylyp, oǵan adamdar lyq toldy. Oqý ornynyń basshylyǵy máseleni sheshetin komissiia qurýdy usyndy.
