Atyraýda aýdan ákimdigi aýyldaǵy jol qurylysyna qatysty synǵa túsinik berdi, dep habarlaidy QazAqparat.
Budan buryn áleýmettik jelide Qurmanǵazy aýdanynyń Aqkól aýylynda salynyp jatqan jaiaý júrginshiler jolyna qatysty video taraǵan edi. Onda video avtory jumsaq topyraqtyń ústine asfalt tóselip jatqanyn aityp, kórsetedi.
Osyǵan bailanysty Qurmanǵazy aýdanynyń ákimdigi túsinik berdi.
«2018 jyly Qurmanǵazy aýdanynyń Aqkól aýylynda jaiaý júrginshi joldary bar aýylishilik joldy rekonstrýktsiialaý jumystaryna joba jasaqtalyp, memlekettik saraptamanyń oń qorytyndysy alyndy. Qurylys jumystary 2019 jyly bastaldy. 2020 jyly qarajat bólinbeýine bailanysty qurylys jumystary toqtap turdy. Qazirgi tańda qarajat bólinip, jumystar jalǵasýda. Merdiger mekeme – «BeketSátJol» JShS, tapsyrys berýshi – Qurmanǵazy aýdandyq turǵyn úi-kommýnaldyq sharýashylyǵy, jolaýshylar kóligi, avtomobil jáne turǵyn úi inspektsiiasy bólimi.
Joba boiynsha qarastyrylǵan 8 shaqyrym jaiaý júrginshiler jolynyń qazirgi tańda 3,3 shaqyrymy tóselgen. Jobaǵa sáikes, jaiaý júrginshiler joly qurylysyna 15 sm qum qiyrshyq tas qospasy (PGS), 4 sm asfalt salynýy qajet. Qurylys jumystary tolyqtai jobaǵa sáikes jasalýda. Qazirgi ýaqytta aýa raiynyń qolaily bolýyna (+6,+8) bailanysty qurylys jumystary jalǵasyp jatyr. Jumys óndirisinde qoldanylatyn material sapasy men aýa raiy jaǵdaiynda paidalaný múmkindigin rastaityn tiisti sertifikattar men jol zerthanasynyń qorytyndylary bar», - delingen Qurmanǵazy aýdanynyń ákimdigi taratqan aqparatta.
Ákimdiktiń aqparatyna qaraǵanda, jol qurylysy tapsyrylǵannan keiin merdiger mekeme onyń sapasyna qatysty 24 aiǵa kepildik beredi. Aýdan ákimdigi bul jumystardy turaqty túrde baqylaýda ustap otyr.
