QR Úkimetinde birqatar kadrlyq ózgerister jasaldy. Bul týraly QR Premer-Ministriniń baspasóz qyzmeti habarlady.
"QR Úkimetiniń qaýlysymen Áset Armanuly Irǵaliev ulttyq ekonomika vitse-ministri laýazymynan bosatylyp, Premer-Ministrdiń ókimimen QR Premer-Ministriniń Keńsesi Basshysynyń orynbasary qyzmetine taǵaiyndaldy" delingen málimdemede.
Áset Irǵaliev 1986 jyly Qostanai qalasynda dúniege kelgen. 2008 jyly Qazaqstandyq menedjment, ekonomika jáne boljamdaý institýtyn, Shvetsiiada halyqaralyq biznes mektebin, 2009 jyly - Iork ýniversitetin jáne 2010 jyly - Nottingem ýniversitetin támamdaǵan. Mamandyǵy - ekonomist. Qazaq, orys, aǵylshyn jáne nemis tilderin meńgergen.
Eńbek jolyn 2010 jylǵy qyrkúiek aiynda Londondaǵy Eýropa qaita qurý jáne damý bankiniń (EQQDB) ekonomika departamentinde Shyǵys Eýropa jáne Kavkaz boiynsha ekonomikalyq saiasattyń aimaqtyq taldaýshysy retinde bastaǵan. 2011 jylǵy qazan aiynan 2012 jylǵy qarasha aralyǵynda osy departamentte Bas óńirlik taldaýshy bolyp qyzmet atqarǵan. 2011 jylǵy qarasha aiynda banktiń óńirlik ekonomisti bolyp eńbek etken.
2013 jylǵy qańtarda «Ekonomikalyq zertteýler institýty» AQ Kásipkerlikti damytý ortalyǵynyń direktory bolyp taǵaiyndalǵan. Atalǵan qurylymda Á. Irǵaliev 2016 jyldyń basyna deiin Basqarma tóraǵasynyń birinshi orynbasary, Basqarma tóraǵasynyń orynbasary, vitse-prezident laýazymdaryn atqarǵan. 2016 jylǵy aqpan aiynda «Ekonomikalyq zertteýler institýty» AQ basqarma tóraǵasy bolyp taǵaiyndalǵan.
2016 jylǵy qazan aiynda «Báiterek» UBH» AQ Basqarma tóraǵasynyń keńesshisi qyzmetin atqardy, 2016 jylǵy jeltoqsanda QR Premer-Ministriniń keńesshisi bolyp taǵaiyndalǵan.
2018 jylǵy shilde aiynan 3 qyrkúiekke Á. Irǵaliev QR Premer-Ministri Keńsesiniń Jobalyq basqarý ortalyǵynyń meńgerýshisi laýazymyn atqarǵan. 2018 jyldyń 3 qyrkúieginen beri QR ulttyq ekonomika vitse-ministri qyzmetin atqaryp kelgen bolatyn.
Sondai-aq, QR aýyl sharýashylyǵy ministrliginiń eki vitse-ministri qyzmetterinen bosatyldy.
Arman Qairatuly Evniev bergen ótinishine sáikes aýyl sharýashylyǵy birinshi vitse-ministri laýazymynan bosatylsa, QR Úkimetiniń qaýlysymen Berik Tursynbekuly Beisenǵaliev bergen ótinishine sáikes aýyl sharýashylyǵy vitse-ministri qyzmetinen bosatyldy.
