QR Joǵarǵy Sotynyń tóraǵasy Jaqyp Asanov sot sheshimderin azamattarǵa túsindirýdiń qanshalyqty paidaly ekenin aityp berdi, dep habarlaidy QazAqparat tilshisi.
«Biz 2018 jyldyń 15 qańtarynan bastap respýblika boiynsha pilottyq joba bastaǵan edik. Osy pilottyq joba aiasynda sýdialar óziniń sheshimin, úkimin nemese qaýlysyn jariialaǵan kezde azamattarǵa ony birden túsindiretin bolǵan. Osy pilottyq jobanyń bastalǵanyna eki aidai ýaqyt bolyp, bir aidyń qorytyndysyn qazir taldap otyrsaq, osy aralyqta 7347 sot sheshimi boiynsha túsindirý jumystary júrgizilipti. Sol isterdiń ishinde tek 142 iske qatysty shaǵym túsken. Bul - isterdiń 1,9 paiyzy ǵana. Bul - biz úshin arman. Bizde 10-nan, tipti keibir kategoriialar boiynsha qaita shaǵym túsken isterdiń úlesi 20 paiyzǵa jetip jatady. Demek, adamdar sot sheshimin, tipti jeńilip qalǵan kúnniń ózinde, túsingennen soń eshqandai qarsylyqsyz qabyldaidy», - dedi Asanov Joǵarǵy Sottyń búgingi jalpy otyrysynda.
Joǵarǵy Sot tóraǵasy, sonymen birge, naqty mysaldardy keltirdi.
«Máselen, SQO sottarynda 274 sot sheshimi túsindirilip, 1 sot sheshimi boiynsha ǵana qaita shaǵym túsken. Al endi qarańyz, sot sheshimi túsindirilgennen keiin Aqmola, BQO, OQO oblystarynda birde-bir iske qatysty shaǵym túspegen. Biz árbir isti kásibi túrde túsindiretin bolsaq, onda joǵarǵy instantsiiaǵa, ásirese Astanaǵa túsetin shaǵymdardyń anaǵurlym azaiatynyna senimim kámil. Sol kezde Joǵarǵy sot kassatsiialyq deńgeide isterdiń bárin qarap, barlyq kedergilerdi joiar edi», - dedi Jaqyp Asanov.
Eske sala ketsek, Joǵarǵy Sottyń búgingi otyrysynda sot sheshimin qurastyrý ádisi boiynsha normativtik qaýlynyń jobasy tanystyryldy.
