Parlament Májilisiniń jalpy otyrysynda QR Bas prokýrory Jaqyp Asanov prokýratýra jumysyn Májilis depýtattarymen salystyrdy, dep habarlaidy QazAqparat.
«Bizde qylystyq protseste eki filtr bar. Mysaly, bir adamdy qamaý kerek boldy delik. Ol máseleni prokýror qaraidy, sodan keiin is sotqa joldanady. Bul - ózindik súzgi. Byltyr tergeýshiler 15 myń adamdy qamaý týraly ótinishpen prokýrorlarǵa keldi. Osy oraida biz árbir ótinishti qanaǵattandyrýdan bas tarttyq. Nátijesinde 3,5 myń adam prokýrordyń sheshimimen tergeý kezinde qamalǵan joq. Al qalǵan 11,5 myń adam boiynsha prokýrorlar sotqa bardy. Óz kezeginde sot 500 adam boiynsha bas tartty. Jalpy, prokýrorlar Májilis siiaqty. Óitkeni Májiliske alǵashqy zań jobalary túsedi, barlyq kemshilikterdi sizder qaraǵannan keiin, Senatqa jiberesizder. Bizde prokýrorlar barlyq kemshilikterdi eskerip, sotqa joldaimyz», - dedi Jaqyp Asanov Qazaqstan Respýblikasynyń keibir zańnamalyq aktilerine quqyq qorǵaý qyzmetiniń protsestik negizderin jańǵyrtý máseleleri boiynsha ózgerister men tolyqtyrýlar engizý týraly» zań jobasy talqylaý barysynda.
Bas prokýror quqyq qorǵaý organdaryndaǵy tsifrlandyrý júiesi saladaǵy qatelikterge jol bermeitinin atap ótti.
«Eń bastysy - tsifrovizatsiialaý adam quqyǵyn qorǵaýdy kúsheitedi. Búkil protsess alaqandaǵydai aiqyn bolady. Prokýrorlyq baqylaý artady. Sybailas jemqorlyq azaiady. IT júie tergeýshiniń, prokýror men sýdianyń jumysyn anaǵurlym jeńildetedi», - dedi Bas prokýror.
Bas prokýratýra ázirlegen IT júie biýdjetten qosymsha qarajatty talap etpeidi. Qylmystyq isterdi tolyqtai tsifrlyq formatqa kóshirýdi 2018 jyldyń sońyna deiin aiaqtaý josparlanyp otyr.
