Búgin M. Áýezov atyndaǵy Qazaq Memlekettik akademiialyq drama teatrynda kórnekti akter, rejisser, Qazaqstan jáne KSRO halyq artisi, Memlekettik syilyqtardyń laýreaty Asanáli Áshimovtyń 80 jasqa tolýyna orai saltanatty kesh ótti.
Kesh tizginin Azamat Satybaldy, Zarina Karmenova, Aqbergen Jumabai jáne Jánel Maqajanova ustady. «Saltanat» bi ansambli jáne teatr artisteri búgingi sharanyń shymyldyǵyn ashty. Retro mashinamen sahnaǵa shyqqan Asanáli Áshimovti jiylǵan kópshilik keń zaldy kernegen ovatsiiamen qarsy aldy. Akter halqymyzdyń birtýar aqyny Qasym Amanjolovtyń «Ei, tákappar dúnie» óleńin oqyp, ónersúier qaýymdy tebirentti. Keńes Odaǵynyń halyq artisi Bibigúl Tólegenova men Asanáli Áshimov kórermender nazaryna «Eńlik-Kebek» spektaklinen úzindi usyndy.
QR Mádeniet jáne sport ministri A. Muhamediuly quttyqtap, QR Prezidentiniń qurmet gramotasyn tabys etti. Qurmanǵazy atyndaǵy Qazaqtyń Memlekettik akademiialyq halyq aspaptar orkestri Bekejan, Jibek, Shegeniń ariialarynan úzindi oinap, kieli sahna men zaldy áýezdi áýenmen áýeletti. Ariialardy teatrymyzdyń jas artisteri Asan Májit, Saltanat Baqaeva, Ázimbek Bailin oryndady.
Almaty qalasynyń ákimi – Baýyrjan Baibek quttyqtaý sóz sóilep, Asanáli Áshimulyna jyly lebizin bildirdi.
Qurmanǵazy atyndaǵy Qazaqtyń Memlekettik akademiialyq halyq aspaptar orkestri Arman Júdebaevtyń bas dirijerligimen «Saryarqa» kúiin oryndady. Qazaqtyq qara dombyrasynyń kúii kúmbirlegen saltanatty kesh Abai atyndaǵy Qazaq memlekettik Akademiialyq opera jáne balet teatrynyń oryndaýyndaǵy «Aittym, sálem, Qalamqas» ánimen jalǵasyn tapty.
Qazaqstan Respýblikasy Parlament Senatynyń depýtaty, memleket qairatkeri – Birǵanym Áitimova quttyqtaý sóz sóilep, ystyq yqylasyn bildirdi. Qolyna qalam alyp tebirengen, taǵylymdy taǵdyr iesi – Asanáli Áshimulyn Jazýshylar odaǵy basqarmasynyń tóraǵasy, aqyn-dramatýrg Nurlan Orazalin quttyqtady. Quttyqtaý sóz kezegin Qazaqstan Respýblikasy Joǵarǵy Sotynyń Tóraǵasy – Qairat Mámi, «Nur Otan» partiiasy tóraǵasynyń birinshi orynbasary – Muhtar Qul-Muhammed jalǵastyryp, halyq súiispenshiligine bólengen akterge izgi nieti men tilekterin joldady. KSRO Halyq artisi, Resei memlekettik syilyqtarynyń iegeri, akter, rejisser – Oleg Tabakov jáne KSRO Halyq artisi, Armeniia memlekettik syilyqtarynyń iegeri – Armen Djigerhanian joldaǵan quttyqtaý hattary oqyldy.
Keshtiń negizgi sebepshisi – Asanáli Áshimov monolog oqyp, «Ilkanto» toby qazaq kinosynyń ánderinen popýrri oryndap, jurtshylyqty ónerdiń nárli dámimen sýsyndatty. Kieli teatr sahnasynda Qalibek Qýanyshbaev teatrynyń «Don Jýannyń dýmany» spektaklinen úzindi qoiylyp, jinalǵan qaýymdy bir serpiltti.
Rýhani azyq izdegen kórermen búgingi keshten túgesilmes janazyq, qaitalanbas áser alyp qaitqany aqiqat. Ótkergen jyldary órnekti, ómir joly ónegeli Asanáli Áshimuly qazaq eliniń mádenietine sińirer eńbegi men óskeleń urpaqqa berer tálim-tárbiesi áli de óz baǵasyn alyp, qurmetke bóleneri haq!
Nurtas TURǴANBEK
