- Úkimettiń búgingi otyrysynda xalyq ártisi Asanáli Áshimov Qarjy ministrliginiń kinony túsirýge bólinetin aqshany kesip tastaiyny úshin Premer-ministr Baqytjan Saǵyntaevqa aryzdandy, dep xabarlaidy Ult.kz tilshisi QazAqparat agenttigine silteme jasap.
«Baqytjan Ábdiruly, kóp jaǵdailar sizderge bailanysty bolady. Kóp nárse jetispei jatady. Jobalaý bóliminde smeta bekitiledi. Sonyń jartysyn avtomatty túrde qyrqyp tastaidy mynaý minfinnen (qarjy ministrliginen - avt.). Sosyn jartysyn ózderiń tabyńdar, deidi. Qaidan tabamyz? Qazir jóndi demeýshiler de joq. Alǵashqy kezde bolýshy edi. Qazir joq. Sonyń saldarynan filmder túsirilmei, jyldap turyp qalady. Mysaly, «Almas qylysh» ta turyp baryp, turyp baryp túsirildi. Baiaǵyda «Qyz Jibek» túsirilgende qarjy Máskeýden keledi. Sol kezde Máskeýdiń aqshasyn jedik, Qazaqstannyń aqshasyn jedik. Bitpei jatyr film. Sodan eń sońynda kastingtiń aqshasyn jep, osyǵan bitirmeseńder, endi jabamyz degende, áiteýir itshilep bitirgenbiz. Biraq máńgilikke qalǵan óner týyndysy boldy. Al óner - xalyqtiki. Óner xalyq úshin jasalady», - dedi Áshimov.
Osy oraida ol ártisterdi raýshan gúlimen teńedi, ony ýaqytynda sýarmasa, solyp qalady.
«Sondyqtan búgingi jinalys tarixi jinalys dep sanaimyz. Sizdermen jii kezdesip turǵan paidaly, áńgimelesip, shúiirkelesip degendei. Men ózim kúndelik jazyp júrgen adammyn. Búgingi kún sol kúndeligime altyn árippen jazylatyn kún dep esepteimin», - dep atap kórsetti xalyq ártisi.
Aita keteiik, otyrys barysynda Mádeniet jáne sport ministri Arystanbek Muxamediuly otandyq kinoindýstriiany damytý máseleleri boiynsha baiandama jasady.
Al Úkimet basshysy Baqytjan Saǵyntaevtyń oiynsha, otandyq kinoindýstriia salasyna biznesti kóptep tartyp, monoqalalar men shaǵyn qalalarda kinoteatrlardy kóptep ashý qajet.
Otyrys barysynda Asanáli Áshimov frantsýzdardyń «Qyz Jibek» filmi arqyly qazaqtardy qalai moiyndaǵany jaiynda aityp berdi.
