Kórnekti teatr jáne kino akteri, rejisser, óner qairatkeri, Qazaqstan jáne KSRO halyq artisi Asanáli Áshimovtiń 80 jyldyq mereitoiyna músin jasaldy, - dep habarlaidy "Ult aqparat" M.Áýezov atyndaǵy drama teatrdyń baspasóz qyzmetiniń ókilderine silteme jasap.
Músindi QR Eńbek sińirgen óner qairatkeri, músinshi Tileýberdi Binashevtiń qyzy Gúlfiia Tileýberdiqyzy jasaǵan. T.Júrgenov atyndaǵy óner akademiiasynyń túlegi búginde "Óner ordasy" sheberhanasynda qyzmet etip, kásibi músin ónerinde óz qoltańbasyn qalyptastyrýda aianbai eńbek etip keledi. Bala kezinen Asanáli Áshimovtiń tálimi men ónegesin kórip ósken Gúlfiia, Asanáli Áshimulynyń 80 jasqa tolǵan mereitoiyna erekshe syi jasaǵandy jón kóripti.
Ol "Rejisser Asanáli" dep ataǵan kompozitsiialyq jumysyn M.Áýezov atyndaǵy Qazaq Memlekettik akademiialyq drama teatryna arnaiy kelip, mereitoi iesine teatr ujymynyń qatysýymen saltanatty túrde tabys etti.
Qoladan jasalǵan músin teatrda saqtalady. Avtordyń aitýynsha, ol bul músindi eki apta ishinde jasapty.
"Asanáli aǵa bizdiń sheberhanamyzǵa jii kelip turady. Ol kisi músin ónerin óte joǵary baǵalaidy. Men Hákimjan Naýryzbaevtyń portrettik músinin jasap júrgende, kerekti kóp aqyl-keńesterin berip otyratyn. Solai júrip men qazaq óneriniń maqtanyshy, álem tanyǵan Asanáli aǵaǵa arnalǵan jumysymdy da bastap kettim. Bul kompozitsiiany jasaýyma eki apta ýaqytym ketti. Sýretshilerdiń aǵaǵa arnaǵan kóptegen jumystary bar. Kóbi akter Asanálini beinelegen. Meniń týyndymda rejisser Asanáli kórinis tapqan. Jumys barysynda ákem keńesin berip, baǵyt siltep otyrdy. Týyndynyń A.Áshimulyna unaǵanyna, batasyn alǵanyma baqyttymyn! Osy oraida ańyz tulǵamyzdy 80 jasqa tolǵan mereitoiymen shyn júrekten quttyqtaimyn! Áýezov teatrynda 12 mamyr kúni ótetin mereitoilyq keshte Asanáli Áshimovtiń shyǵarmashylyǵyna arnalǵan kórme uiymdastyrylyp jatyr. Kópshilik kórermen "Rejisser Asanáli" týyndysyn osy kórmede tamashalai alady!"- dep óz lebizin jetkizdi Gúlfiia Binasheva.
Al óz kezeginde teatrdyń ókilderi músinge joǵary baǵa berip otyr. "Gúlfiia Tileýberdiqyzynyń músini monýmental plastikada eshqandai nemquraidylyqqa, quntsyzdyqqa jol bermei, halyq jadyndaǵy Asanáli Áshimov beinesin dáldikpen beinelegen! Sharttylyqtan alys, erkindik ebi esetin atalmysh týyndy erekshe mahabbatpen jasalǵany sózsiz sezilip tur!", - deidi teatr ókilderi.
Esterińizge sala keteiik, biyl kórnekti teatr jáne kino akteri, rejisser, óner qairatkeri, ulaǵatty ustaz, Qazaqstan jáne KSRO halyq artisi, Memlekettik syilyqtardyń laýreaty, Halyqaralyq festivalderdiń birneshe márte júldegeri, "Otan" ordeniniń iegeri, Qazaqstan Jazýshylar Odaǵynyń múshesi, M.Áýezov atyndaǵy Qazaq Memlekettik akademiialyq drama teatrynyń kórkemdik jetekshisi Asanáli Áshimov 80 jasqa tolyp otyr.
