M. Aiqymbaev atyndaǵy asa qaýipti infektsiialar ulttyq ǵylymi ortalyǵyna «Zerthanalarǵa arnalǵan biotáýekel menedjmenti» ISO 35001 halyqaralyq sertifikaty saltanatty túrde tabystaldy. Bul jóninde Densaýlyq saqtaý ministrliginiń baspasóz qyzmeti habarlady.
Búginnen bastap AQIUǴO Ortalyq referens-zerthanasy Orta Aziiadaǵy nómiri birinshi zerthana bolyp esepteledi.
Sonymen qatar, zerthanalyq biologiialyq táýekelderdi basqarýdyń jańa halyqaralyq standarty boiynsha akkreditatsiiadan ótken, kez kelgen táýekeldi baqylaý jáne azaitý maqsatynda qaýipti biologiialyq agenttermen jáne materialdarmen jumys isteitin zerthanalarǵa qoiylatyn talaptar men usynymdardy aiqyndaityn álemdegi alǵashqy zerthanalardyń biri.
ISO 35001 sertifikaty boiynsha akkreditatsiiaǵa usynylǵan úsh ministrliktiń (DSM, BǴM, AShM) biologiialyq jáne ózge de táýekelderdi basqarý salasyndaǵy ORZ qyzmetkerleri ózderiniń joǵary kásibi biliktiligin kórsetti, iaǵni bul júrgiziletin zertteýlerdiń halyqaralyq deńgeide qaýipsiz ekenin bildiredi.
Aita ketý kerek, ORZ alǵashqylardyń biri bolyp standartta sipattalǵan biologiialyq táýekelderdi baqylaýdyń jańa júiesin zertteýge jáne engizýge kiristi.
COVID-19 indetine bailanysty qalyptasqan qiyn jaǵdaiǵa qaramastan, júrgizilgen zertteýler sapasyn saqtap qana qoimai, onyń deńgeiin joǵarylatqan áriptesterimizdi quttyqtaimyz, bul halyqaralyq deńgeidegi moiyndaý dep bilemiz.
ORZ halyqaralyq standart boiynsha akkreditatsiiadan ótýi óńirlik jáne jahandyq biologiialyq qaýipsizdikti arttyrýǵa yqpal etedi.
Aita keteiik, bul ortalyqóz jumysyn 1949 jyly obaǵa qarsy Orta Aziia ǵylymi-zertteý institýty qurylǵanda bastaǵan. 1992 jyldyń qańtarynda QR DSM Qazaq obaǵa qarsy ǵylymi-zertteý institýty bolyp ózgertildi. 2001 jyly M. Aiqymbaev atyndaǵy Qazaq karantin jáne zoonozdyq infektsiialar ǵylymi ortalyǵy bolyp qaita quryldy.
2019 jylǵy shildede QR Úkimetiniń qaýlysymen M. Aiqymbaev atyndaǵy asa qaýipti infektsiialar ulttyq ǵylymi ortalyǵy dep atala bastady.
Onyń quramyna obaǵa qarsy 9 óńirlik filial kiredi. AQIUǴO jáne onyń filialdarynyń missiiasy - elimizde biologiialyq qaýipsizdikti qamtamasyz etý, adamdar men janýarlar arasyndaǵy aýrýlardyń aldyn alý jáne azaitý úshin Qazaqstan aýmaǵynda azamattardyń asa qaýipti infektsiialardy juqtyrý qaýipine monitoring jasaý, aldyn alý, baǵalaýdyń ǵylymi negizderin ázirleý jáne engizý.
