Jarylys bolǵan Arys qalasynda búginde qalpyna keltirý jumystary aiaqtalýǵa jaqyn. Bul týraly jýrnalisterge suhbat bergen qala ákimi Murat Qadyrbek málim etti, dep habarlaidy "Ult aqparat".
Qala basshysynyń sózinshe, qalpyna keltirý jumystary 17 sektor arqyly júzege asyrylǵan. Qala boiynsha 8522 turǵyn úi bar bolatyn bolsa, onyń ishinde 104-i kópqabatty baspana sanalady. Búginde turǵyn úiler boiynsha qurylys jumystary tolyǵymen aiaqtalyp, aǵymdaǵy jáne kúrdeli jóndeý jumystary jalǵasýda.
«Bastapqy kezde 22 úi súrilip, qaita salynýy tiis bolsa, keiin jóndeý jumystary kezinde olardyń sany 474 úige jetti. Kúni búginge deiin barlyǵy salynyp, qabyrǵalary turǵyzylǵan. Shatyrlary jabylyp, ishki árleý jáne jylý kirgizý jumystary júrgizilýde. Qalada 11 sektor jumystaryn tolyǵymen aiaqtap, qaityp ketti. Qalǵan 6 sektorda qujattandyrý siiaqty sońǵy jumystar júrgizilip, aiaqtalýǵa jaqyn», - deidi Arys qalasynyń ákimi.
Murat Qabyrbektiń aitýynsha, qaladaǵy infraqurylymdy retteý barysynda Arys qalasynyń káriz júieleri tolyq jóndeýden ótip, avtomattandyrylǵan. Qala jylytý maýsymyna da tolyq daiyn. Zaqym kelgen Arys kósheleri de jóndeýden ótti. Onda aiaqjoldar salý jumystary aiaqtalyp, jaryqtandyrý júrgizilip jatyr.
«Qala kósheleriniń 98 paiyzy jóndelip bitken. 63 kósheni jóndeý kerek bolsa, sonyń 60-ynda jumystar tolyqtai aiaqtalǵan. Taǵy 3 kóshede sońǵy jumystar júrgizilip jatyr. Sonymen qatar qalanyń aýmaǵynda 500-den asa kásipkerlik nysany bolatyn bolsa, olardyń barlyǵynda kásipkerler óz esepterinen jóndeý jumystaryn júrgizip jatyr. «Atameken» Ulttyq kásipkerlik palatasy arqyly olarǵa ótemaqy tólenýde», - deidi qala basshysy.
Ol sondai-aq, áleýmettik mańyzy bar 64 nysan «Samuryq-Qazyna» ulttyq ál-aýqat qory» esebinen jóndelgenin jetkizdi. Atalǵan qor arqyly jaramsyz kúige túsken 3 nysan qaita salynǵan. Olardyń qatarynda sporttyq keshen, jedel járdem qyzmeti men tis emdeý ortalyqtary bar. Bul nysandar osy aidyń sońynda paidalanýǵa beriledi dep kútilýde.
