Elbasy N.Nazarbaev shikizatqa táýeldilikten qutylyp, biýdjet qorjynyn ózge salalarmen, atap aitqanda týrizm klasterin damytý arqyly toltyrýdy mindettegen bolatyn. Sońǵy jyldary osy baǵytta kóptegen sharýalar qolǵa alynyp jatyr. Búgingi tańda Arystanbab jáne Otyrartóbeniń ainalasyn abattandyrý jumystary bastaldy.
Búgin Otyrar aýdanyna QR Mádeniet jáne sport ministri Arystanbek Muhamediuly arnaiy issaparmen kelip, Elbasy Nursultan Ábishulynyń «Bolashaqqa baǵdar :rýhani jańǵyrý» maqalasy aiasynda Otyrar qalajurty mańynan salynǵaly jatqan «Otyrar qalajurtynyń sapar-ortalyǵyna» «amanat hat» kapsýlasyn ornatý rásimine qatysty.
"Bizdiń maqsatymyz Elbasy tapsyrmasyn buljytpai oryndap, tarihymyz ben mádenietimizdi álemge pash etý. Búgingi sharamyz Uly Jibek joly boiynda jatqan tarihi ólkeni sheteldikterge tanytýdyń basy bolmaq", - degen Arystanbek Muhamediuly Arystanbab pen Otyrartóbeni jalǵap turǵan 17 ga jerde salynatyn nysandardyń jobalarymen de tanysty.
Munda sapar ortalyǵynan bólek ártúrli nysandar boi kótermek. Olardyń qatarynda etno ortalyq, joǵary dárejeli 60 oryndyq qonaq úi, skver syndy kóptegen jańa jobalar bar. Bul nysandardyń qurylysyna biýdjet qarjysymen qatar jeke investorlar da tartylmaq. Osy nysandar paidalanýǵa berilgende týristerdiń Otyrar tarihymen tolyq tanysýyna múmkindikteri bolady.
Budan soń ministr Arystanbek Muhamediuly Otyrartóbedegi qazba jumystarymen tanysyp, qaita jańǵyrǵan Otyrar memlekettik arheologiialyq qoryq-mýzeiin aralady.
Sondai-aq, Qazaqstan Respýblikasynyń elordasy – Astana qalasynyń 20-jyldyǵy aiasynda «Uly Dala Eline saiahat» jobasynyń «Jańa Jibek joly» baǵdaryna qatysýshylar Almaty jáne Jambyl oblystaryndaǵy kórikti jáne tarihi oryndardy aralap ótip, Túrkistan oblysyndaǵy tarihi orynǵa kelip jetkeni belgili. Kieli ólkelerdi ai kóleminde aralap shyqqan uly muratty saiahatshylardy Otyrar aýdanynda qarsy alǵan Arystanbek Muhamediuly "Uly Dala Eline saiahat" ekspeditsiasynyń aiaqtalýymen quttyqtady.
.jpeg)