Shymkent densaýlyq saqtaý basqarmasy Arys qalasyndaǵy jarylystan keiin meditsinalyq kómekke júgingen zardap shegýshiler týraly habarlady, dep jazady Sputnik.
"Arystaǵy tótenshe oqiǵa kezinde zardap shekken otyz tórt adam Túrkistan oblystyq klinikalyq aýrýhanasyna jetkizildi. Ár túrli jaraqat alǵan taǵy 12 adam Shymkent qalasynyń № 1 aýrýhanasyna ózderi keldi, olardyń arasynda bes bala bar", - dep aqparat berdi vedomstvonyń baspasóz qyzmeti.
Densaýlyq saqtaý basqarmasynyń málimetinshe, dárigerler kishkentai naýqastardy qarap shyqqannan keiin oblystyq balalar aýrýhanasyna jiberdi. №1 qalalyq aýrýhanasynyń jan saqtaý bóliminde bir adam jatyr. Onyń jaǵdaiy aýyr dep baǵalanyp otyr.
Aita keteiik, búgin tańerteń Túrkistan oblysynyń Arys qalasyndaǵy áskeri bólim qoimasynda jarylys boldy. Birneshe óńirdiń Tótenshe jaǵdailar departamenti shuǵyl jeliler qurdy. Kóp uzamai oblys basshysy Ómirzaq Shókeev bastaǵan arnaiy komissiia Arystaǵy áskeri bólimge attandy. Jaǵdaidyń aýqymymen tanysqan óńir ákimi Arys turǵyndaryn evakýatsiialaý týraly sheshim qabyldanǵanyn málim etti. QR IIM Tótenshe jaǵdailar komiteti turǵyndar qaida jáne qalai evakýatsiialanyp jatqanyn habarlady.
QR Prezidenti Qasym-Jomart Toqaev tiisti organdarǵa Arystaǵy tótenshe jaǵdaidyń zardaptaryn joiý týraly tapsyrma berdi.
Keiin habarlanǵandai, oqiǵa ornyna Qorǵanys ministri Nurlan Ermekbaev ushyp shyqty.
