Áleýmettik jelide jurt Arys qalasyndaǵy joiqyn jarylystan meshittiń aman qalǵanyn qyzý talqylap jatyr, dep habarlaidy Sputnik Qazaqstan.
Instagram jelisindegi shymgramm paraqshasynda jariialanǵan videoda Arysta meshittiń jarylystan aman qalǵany aitylady.
"Meshittiń birde-bir áinegi synbapty. Al ainalasyndaǵy úilerdiń áinegine zaqym kelipti. Qudaidyń qudyretin qara", - deidi videodaǵy er azamat.
Jeli qoldanýshylary videony qyzý talqylap, Allanyń qudireti sheksiz ekenin aityp jatyr.
Osy oraida biz Arys qalasy ortalyq meshitiniń bas imamy Abdýkaman Abdýkarimge habarlastyq. Ol videodaǵy kadrda Ysqaq meshiti beinelengenin aitady. Biraq bas imam meshittiń terezi synǵanyn atap ótti.
"Bul meshittiń qurylysy 1990 jyldary bastalyp, 1994 jyly bitken. Allanyń úii halyqtyń qoldaýymen asarlatyp sapaly salyndy. Jarylystan meshittiń terezesi men esigi synǵan. Meshitke qatty zaqym kelmegen. Arys óńirinde jalpy 27 meshit bar. Al qaladaǵy meshittiń sany – 9. Jarylystan 9 meshittiń terezesi men esikteri syndy", - deidi bas imam.
Sondai-aq joiqyn jarylystan qaladaǵy jalǵyz provoslav shirkeýi de aman qalypty.
"Shirkeýdiń shatyry búlingen. Biraq shirkeýge qatty zaqym kelmegen. Tańǵalarlyq jaǵdai. Qudaidyń arqasy. Shirkeýdiń janynda mektep bar. Ondaǵy barlyq tereze qiraǵan. Shatyryna qatty zaqym keldi", - deidi shirkeý qyzmetkeri Dionisii.
Shymkent qalasynyń bas imamy Baqtybai Beisenbaev Arystaǵy meshitterdi jóndeý máselesi aldaǵy ýaqytta talqylatynyn jetkizdi.
"Jarylystan birneshe meshittiń terezi syndy, ony jóndeý kerek. Qazaqstan musylmandary dini basqarmasy bul máseleni qarastyrady", - dedi ol.
Áńgime barysynda bas imam Arys qalasynyń turǵyndaryna qandai kómek kórsetilip jatqanyn aitty.
"Shymkent qalasyna Arystan kelgen 25 myń adam ornalastyryldy. Imamdar halyqty sabyrǵa shaqyrdy. Qala halqy barynsha kómektesip jatyr", - dep túiindedi sózin Baqtybai Beisenbaev.
