QR Densaýlyq saqtaý vitse-ministri Oljas Ábishev qazir jedel járdem brigadalary saqadai sai ekenin aitty.
«Qazirgi tańda 165 adam meditsinalyq kómekke júgindi. Olardyń 75 meditsinalyq kómek kórsetilgennen keiin ambýlatorlyq emdeýge jóneltilse, 89 patsient statsionarlyq emdeýge jiberildi. Jan saqtaý bólimderinde 15 patsient jatyr. Naýqastardyń kópshiligi Shymkent qalasynyń aýrýhanalarynda em qabyldaýda. Qalǵan patsientter Túrkistan oblysynyń ortalyq aýdandyq aýrýhanalarǵa ornalastyrylǵan», - dedi Oljas Ábishev arnaiy brifingte.
Vitse-ministrdiń aitýynsha, meditsinalyq kómek kórsetý úshin Arys qalasy, Ordabasy aýdany, Túrkistan, Kentaý men Shymkent qalalarynyń 22 jedel járdem brigadasy daiyn tur. Qosymsha 4 brigada Jambyl oblysynan baǵyttaldy. Jambyl jáne Qyzylorda oblystarynyń taǵy 12 brigadasy saqadai sai. Túrli sala dárigerleri bar 2 sanitarlyq aviatsiia brigadasy da konsýltativtik kómek kórsetý úshin Almatydan Shymkentke jóneltildi.
«Búgingi tańda mamandar aýyr haldegi patsientterdiń barlyǵyna konsýltativtik kómek kórsetti. Bireýine sol jerde ota jasaldy. Jedel tasymaldaý úshin 2 sanitarlyq aviatsiia túkushaǵy daiyn tur. Olar meditsinalyq quraldarmen jabdyqtalǵan, mobildi toby da bar. Qazirgi kezde Densaýlyq saqtaý ministrligi men jergilikti atqarýshy organdar tótenshe jaǵdaidan zardap shekkenderge qajetti meditsinalyq kómek kórsetý úshin bar kúshin jumsap otyr», - dedi Oljas Ábishev.
