Arysta bolǵan apat saldarynan 31 adam túrli dene jaraqattarymen Túrkistan oblysyna qarasty aýrýhanalarǵa jetkizildi. Bul týraly oblystyq Qoǵamdyq densaýlyq saqtaý basqarmasynan málim etti, dep habarlaidy "Ult aqparat".
«Osy ýaqyttaǵy jaǵdai boiynsha, oblystyń meditsinalyq mekemelerine zardap shekken 31 adam jetkizildi. Sońǵy málimetter naqtylanýda», - delingen basqarma aqparatynda.
Naýqastardyń basym bóligi Oblystyq klinikalyq aýrýhanada jatyr. Olarǵa barlyq qajetti meditsinalyq kómek kórsetilýde. Arystaǵy tótenshe jaǵdaiǵa orai Ordabasy aýdanynda meditsinalyq shtab quryldy.
Túrkistan oblysy Densaýlyq saqtaý basqarmasynyń basshysy Muqan Egizbaevtyń basqarýymen shuǵyl jumystar júrgizilip jatyr. Ordabasy aýdandyq ortalyq aýrýhanada jáne Oblystyq klinikalyq aýrýhanada 200-den astam naýqasqa arnalǵan oryn daiyndaldy.
Jedel járdem brigadasynyń 30 kóligi Shymkent qalasyna kirer 3 jolǵa qoiyldy. Qajet bolǵan jaǵdaida birneshe aýdandardan aldyrylǵan qosymsha jedel járdem kólikteri daiyn.
«Oblystyq klinikalyq aýrýhanadan travmatolog, hirýrg, reanimatolog dárigerler qurylǵan meditsinalyq shtabqa jinaldy. Qazirgi kezde jaraqat alǵandar joq. Evakýatsiia jumystary júrgizilip jatyr. Arys qalalyq ortalyq aýrýhanasy men emhanasynan naýqastar evakýatsiialandy. Mamandar da jedel járdem kólikteri de oblys boiynsha jetkilikti», - delingen aqparatta.
Aita keteiik, búgin tańerteń Túrkistan oblysynyń Arys qalasyndaǵy áskeri bólim qoimasynda jarylys boldy. Birneshe óńirdiń Tótenshe jaǵdailar departamenti shuǵyl jeliler qurdy. Kóp uzamai oblys basshysy Ómirzaq Shókeev bastaǵan arnaiy komissiia Arystaǵy áskeri bólimge attandy. Jaǵdaidyń aýqymymen tanysqan óńir ákimi Arys turǵyndaryn evakýatsiialaý týraly sheshim qabyldanǵanyn málim etti. QR IIM Tótenshe jaǵdailar komiteti turǵyndar qaida jáne qalai evakýatsiialanyp jatqanyn habarlady.
QR Prezidenti Qasym-Jomart Toqaev tiisti organdarǵa Arystaǵy tótenshe jaǵdaidyń zardaptaryn joiý týraly tapsyrma berdi.
Keiin habarlanǵandai, oqiǵa ornyna Qorǵanys ministri Nurlan Ermekbaev ushyp shyqty.
