Arys qalasyndaǵy oq-dári qoimasynda bolǵan jarylys saldarynan kelgen shyǵyndy 16 adam óteidi. Mundai sheshimdi Astana qalasynyń Esil aýdandyq soty shyǵardy, dep habarlaidy QazAqparat.
«Qazaqstan Respýblikasynyń Qorǵanys ministrligi (budan ári - talapker, ministrlik) 2019 jylǵy 24 maýsymda Arys qalasynda oq-dárilerdiń jarylýy saldarynan týyndaǵan 97 mlrd teńgeden astam zalaldy 16 jaýapkerden memleket kirisine óndirip alý týraly talap aryzben sotqa júgindi. Jaýap berýshiler - burynǵy áskeri qyzmetshiler. Olar qyzmet barysynda órt qaýipsizdigi, oq-dárilerdi saqtaý, ótkizý jáne kádege jaratý, tehnikalyq baqylaý úshin jaýapty boldy. Bir jaýap berýshi kúzet-órt dabylyn ornatýdy júzege asyrǵan JShS basshysy sanalady», - delingen aýdandyq sot taratqan aqparatta.
Taratylǵan málimetke sáikes, oq-dári jarylysyn jaýap berýshilerdiń barlyǵynyń kinási Shymkent garnizony Áskeri sotynyń 2019 jylǵy 24 maýsymdaǵy zańdy kúshine engen úkimimen anyqtalǵan. Osy úkimmen ministrlikke azamattyq sot isin júrgizý tártibimen múliktik talaptardy qanaǵattandyrý quqyǵy berilgen. Talapkerdiń talaby jarylys saldarynan Qazaqstan Respýblikasy Qarýly Kúshteriniń, 44859-áskeri bólimniń, 16752-áskeri bólimniń, 74884-áskeri bólimniń teńgerimindegi ǵimarattardy, qurylystardy, infraqurylymdy buzý, oq-dárilerdi joiý túrinde memleketke múliktik zalal keltirilgendigimen negizdelgen. Sot taǵaiyndaǵan saraptamanyń qorytyndysyna sáikes, zalaldyń jalpy somasy 96 373 286 573, 37 teńgeni quraidy.
«QR Azamattyq kodeksiniń 932-babynda birlesip keltirilgen ziian úshin jaýapkershilik kózdelgen. Birlesip ziian keltirgen adamdar jábirlenýshiniń aldynda birge jaýap beredi. Sot belgilengen jaǵdailardy eskere otyryp, talap qoiýdy qanaǵattandyrý týraly qorytyndyǵa keldi. Astana qalasy Esil aýdandyq sotynyń 2022 jylǵy 19 qazandaǵy sheshimimen jaýap berýshilerden memleket kirisine sot saraptamasyna sáikes, zalal men sot shyǵyndary yntymaqty tártippen óndirildi. Sot sheshimi zańdy kúshine engen joq», - dep atap ótedi sottan.
