Arys qalasynda joǵalǵan jáne adasyp ketken balalar joq. Bul týraly ishki ister ministriniń orynbasary Iýrii Ilin málimdedi, dep habarlaidy Sputnik Qazaqstan tilshisi.
Ilinniń aitýynsha, zardap shekken 19 bala Arys qalasynan Shymkentke jetkizilgen. Bir jasqa deiingi úsh sábidi ata-anasy tún ishinde alyp ketipti.
"Basqa eldi mekenderde qalǵan balalar bar. Ata-anasy olardyń qaida ekenin biledi. Dál qazir joǵalǵan balalar joq", - dedi ol ortalyq kommýnikatsiialar qyzmetinde ótken brifingte.
Buǵan qosa, Ilin Densaýlyq saqtaý ministrligi men Ishki ister ministrliginiń jarylystan zardap shekkenderdiń sanyna qatysty málimeti nege ártúrli ekenin túsindirdi. Aitýynsha, Densaýlyq saqtaý ministrligi qan qysymy kóterilgen adamdardy esepke alsa, Ishki ister ministrligi jarylys saldarynan jaraqat alǵandardy ǵana esepteidi eken.
"Ókinishke qarai, memlekettik organdardyń árqaisysy ártúrli tsifr keltirip jatyr. Qazir bárin bir retke keltirý úshin tótenshe jaǵdailar komitetiniń bazasynda jedel basqarý ortalyǵynyń jumysy uiymdastyryldy", - dedi ministrdiń orynbasary.
Sonymen qatar, brifing barysynda BAQ ókilderi Arys perzenthanasyndaǵy analardyń jaǵdaiy týraly surady. Densaýlyq saqtaý vitse-ministri Oljas Ábishevtiń aitýynsha, 26 jedel járdem brigadasy (onyń tórteýi Jambyl oblysynan qosylǵan) perzenthana qyzmetkerleri men onda jatqan áielderdi Shymkent qalasyna kóshirgen.
"Qazir áiederdiń jaǵdaiy ortasha, ómirine eshqandai qaýip-qater tónip turǵan joq. Shymkentte barlyq meditsinalyq qyzmet tolyǵymen kórsetilip jatyr", - dep sendirdi ol.
