«Arys» stantsiiasyndaǵy vagon órtinen zardap shekkender týraly qońyraý túsken joq. Túrkistan oblystyq Tótenshe jaǵdailar departamenti osyndai málimet taratty, dep habarlaidy "Ult aqparat".
«Búgin saǵat 16.25-te Túrkistan oblysy Arys temirjol stantsiiasynyń dispetcherinen «Assa stantsiiasy - Jambyl oblysy - Túrkistan oblysynyń Arys stantsiiasy» baǵytyndaǵy júk poiyzynyń vagonynan tútin shyǵyp jatqany týraly habar kelip tústi.
Tútin 64 vagon tirkelgen poiyzdyń №54 vagonynan shyqqan. Ondaǵy júk «Qazfasfat» JShS-nyń reseilik kásiporynǵa jóneltken sary fosfor ekeni anyqtaldy. Júk 20 tonnalyq konteinerge tielgen. Onyń naqty kólemi eseptelip jatyr», - dep jazady departamenttiń baspasóz qyzmeti.
Oqiǵa ornynda jedel shtab qurylyp, jergilikti ákimdik shaǵyn aýdan turǵyndaryn evakýatsiialaý týraly sheshim qabyldaǵan bolatyn.
«Arys qalasynyń Naýryz shaǵynaýdanynda (halyq sany 4 myńǵa jýyq) jáne Hlopkom kentinde (halyq sany 6 myńǵa jýyq) 4 evakýatsiialyq pýnkt uiymdastyryldy.
4 mektep ǵimaratynda 8 myń oryn ázirlendi. Evakýatsiialanǵandardyń sany naqtylanýda, kóbi týystarynyń úiin panalap jatyr.
Saǵat 20.30-daǵy jaǵdai boiynsha, jedel shtabtyń shuǵyl jelisine aqparattyq sipattaǵy 2 qońyraý kelip tústi. Zardap shekkender týraly aqparat túsken joq», - delingen resmi aqparatta.
Tótenshe jaǵdai qyzmetiniń málimetinshe, saǵat 19.22-de órt oqshaýlanyp, beti qaitqan. Tótenshe jaǵdaidy joiýǵa departamenttiń 35 qyzmetkeri men 6 tehnikasy, «QTJ»-nyń 11 qyzmetkeri, 1 tehnikasy jáne órt poiyzy, 60 politsiia qyzmetkeri men 9 tehnika, 8 áskeri qyzmetshi men 2 áskeri tehnika, epidemiologiialyq baqylaý basqarmasynyń 3 qyzmetkeri men bir sanitarlyq tehnikasy tartylǵan.
