Túrkistan oblysynyń Arys qalasynda egistik alqaptaryn tekserip qaraý barysynda 200-den astam oq-dári qaldyǵy tabyldy. Bul týraly búgin QR Qorǵanys ministriniń orynbasary Baqyt Qurmanbaev aitty, dep habarlaidy QazAqparat.
«Qulaǵan oq-dári izi tabylǵan jaǵdaida, shuńqyrda oq-dári qaldyqtarynyń bar-joǵy tekseriledi. Mundaida 5 metrge deiingi tereńdikti qamti alatyn bomba izdeý quraly qoldanylady. Olar óziniń tiimdiligin kórsetti. Egistik alqaptaryn tekserý barysynda 1,5 metrden 3 metrge deiin jerge kirip ketken 200-den astam oq-dári qaldyǵy tabylyp, alyndy», - dedi Qorǵanys ministriniń orynbasary.
Onyń atap ótýinshe, qaýipsizdik sharalaryn saqtaý jáne jarylý qaýpi bar qaldyqtardy joiý barysynda oq-dárini arnaiy shuńqyrǵa qoiý jumystary airyqsha saqtyqpen júrgiziledi. Bul, olardyń jan-jaqqa ushýyna jol bermeý maqsatynda jasalady. Buǵan qosa, jarý jumystaryn júrgizetin toptyń komandiri jarylǵysh zattardyń zariad qýatyn naqty eseptep, olardy durys ornatýy qajet.
«Jarylý qaýpi bar qaldyqtarmen jumystar kezinde saperler qorǵanys kostiýmynyń «Sokol» jáne «Saqtaý» syndy jeńil úlgilerin, sonymen qatar «Saýyt» syndy aýyr úlgilerin kiedi. Oq-dárilerdiń jarylý qaýpi bar qaldyqtary jol talǵamaityn úshóstik bortty avtomobildermen tasymaldanady. Olar júrgizýshini tosyn jarylystan qorǵai alady», - dedi Baqyt Qurmanbaev.
