«Qazaqstan temir joly» ulttyq kompaniiasy Arystaǵy jarylystan keiin Túrkistan oblysynda temirjol qatynasy qalai uiymdastyrylyp jatqanyn aitty, dep habarlaidy QazAqparat tilshisi.
Temirjol kompaniiasyna qarasty «Jolaýshylar tasymaly» AQ baspasóz hatshysy Dias Ahmetsháriptiń aitýynsha, 2 kúnniń ishinde Túrkistan oblysynyń aýmaǵynda joldan qalǵan 11 myń jolaýshy balama baǵyttar men avtokólik arqyly tasymaldanǵan.
Joldan qalǵan jolaýshylarǵa qolaily jaǵdai týǵyzýǵa Túrkistan oblysymen qatar kórshiles Jambyl oblysynyń atqarýshy organdary da kómektesýde.
«Arystaǵy tótenshe jaǵdaiǵa bailanysty Shymkent-Arys-Túrkistan baǵyty boiynsha barlyq poiyzdar toqtatylǵanyn bilesizder. Osyǵan bailanysty 13 jolaýshy poiyzy «Jezqazǵan-Jaryq» úzigi arqyly ótken. Búginnen bastap jańa baǵyt túzildi. 10 jolaýshy poiyzy «Jesqazǵan-Sekseýil» baǵyty arqyly ketip jatyr. Sonymen qatar Shymkent-Túrkistan qalalarynyń arasyna avtokólikter tasymaldap qatynap tur. Bul iste Túrkistan, Jambyl oblysy men Shymkent qalasynyń ákimdigi birlesip kómektesýde. Eki kúnde 11 myń jolaýshy tasymaldandy. Onyń eki myńy avtokólik arqyly jaily orynǵa jetkizildi», - degen Dias Ahmetshárip balama baǵyttarmen joldy jalǵastyrýǵa 11 myń jolaýshynyń jartysynan astamy keliskenin aitady.
«Jolaýshylar tasymaly» AQ-nyń Servis jáne klienttermen jumys departementiniń direktory Álibek Sultanov joldy jalǵastyrýdan bas tartqandardyń barlyǵyna bilet quny 100 paiyz qaitarylyp jatqanyn aitady.
«Bas tartqan jaǵdaida bilet qunynyń 100 paiyzyn ótep beremiz. Bul jaǵynan eshqandai másele joq. Tótenshe jaǵdai kesirinen jospary buzylyp, joldan qalǵany úshin renish bildirgender de bar. Biraq olardyń sany saýsaqpen sanarlyq», - deidi ulttyq kompaniia ókili.
Eske salsaq, buǵan deiin Arystaǵy jarylystan úshinshi adamnyń qaitys bolǵany habarlanǵan bolatyn.
Búgin Parlament depýtattary Arys turǵyndarymen kezdesý úshin Túrkistan oblysyna attandy.
Tótenshe jaǵdaidyń qaýpi áli seiilmegendikten, turǵyndarǵa qalaǵa oralýǵa bolmaityndyǵy eskertilgen.
