Arystaǵy jarylystan keiin zaqym kelgen 7635 úidiń kóbi jóndelip, keibiri qaita salynyp, halyqtyń igiligine berildi, dep habarlaidy QazAqparat.
«Arysta jalpy 8626 úi bar. Jarylys saldarynan 7635 úi zardap shekken bolatyn. Onyń ishinde 480 jaramsyz dep tanylyp, qaitadan salynyp, paidalanýǵa berildi. Jóndeýdi qajet etetin 7255 úige jóndeý jumystary júrgizilip, halyq igiligine berildi», - dedi OKQ-daǵy baspasóz máslihatyna onlain rejimde qatysqan Arys qalasynyń ákimi Murat Qadyrbek.
Onyń aitýynsha, metsenat Bolat Ótemuratovtyń qory qala turǵyndaryna qospáterli 50 úidiń qurylysyn salyp, 100 otbasy baspanamen qamtamasyz etilgen.
«Tótenshe jaǵdaidan zardap shekken Arys qalasy men Aqdala, Dermene, Qojatoǵai aýyldyq okrýgterine qarasty 8 eldimekende turatyn 62 610 azamatqa 6 mlrd 661 mln teńge ótemaqy tólendi. Arys qalasy boiynsha tótenshe jaǵdaidan zardap shekken kásipkerlik nysandardyń sany — 467. Onyń ishinde 404 nysannyń iesine «Meniń Atamekenim» qoǵamdyq qory arqyly 3 mlrd 69 mln teńge kóleminde kásipkerlik nysandaryn qalpyna keltirý úshin ótemaqy tólendi. 63 kásipkerlik nysan iesine qorda qarajattyń jetispeýine bailanysty tólemdi aldaǵy ýaqytta berýdi josparlap otyrmyz», - dedi ol.
Sonymen qatar, Arysta jalpy 66 áleýmettik nysan zardap shekti. Sonyń ishinde balabaqsha, mektep pen sport kesheni bar. Jarylystan keiin 4 nysan jańadan salynǵan.
