Arysta taǵy bir áleýmettik nysan ashylyp, el igiligine paidalanýǵa berildi. Syrdariia eldi mekeninde Sadyqbek Adambekov atyndaǵy saiabaq ashyldy. Onyń ashylý saltanatyna qala ákimi Gúljan Qurmanbekova men belgili qoǵam qairatkeri, ádebiet janashyry, jazýshy-synshy Qulbek Ergóbek, S.Adambekovtiń týystary jáne jergilikti turǵyndar qatysty.
5 myń sharshy metr aýmaqty alyp jatqan saiabaq jergilikti kásipkerlerdiń demeýshiligimen qaita qurylymdaýdan ótip, zamanaýi talapqa sai halyq serýendeitin ortalyqqa ainaldy.
«Mundai nysannyń ashylýy bizdiń qoǵamnyń mádenietin kóterip, tanym-túsinigin tereńdetedi. Adambekov atyndaǵy saiabaqqa kelgen azamattarymyz onyń kim bolǵanyn bilýmen qatar, salamatty ómir saltyn ustansa, jastarymyz Sadyqbek atamyzdyń týyndylarynan tálim alady dep senemin. Biz osylaisha, Arys topyraǵynan shyqqan taý tulǵalarymyzdy urpaqqa úlgi, ónege etip kelemiz. Osy jolda eńbek etip, ter tógip júrgen jandardyń barlyǵyna da sheksiz rizashylyǵymdy bildiremin», - dedi Gúljan Mamytqyzy.
Saltanatty shara aiasynda saiabaqta Sadyqbek Adambekovtiń eńseli eskertkish-biýsti ashyldy. Jergilikti músinshi Ábýtálip Kúzdeýbaev qolynan shyqqan týyndynyń tuǵyry 3, al músin biiktigi 1,5 metr. Jiynǵa arnaiy kelgen ziialy qaýym ókilderi men qonaqtar satirik jazýshynyń ónegeli ómirin eske alyp, eńbeginen nasihat aitty.
«Sadyqbek Adambekovtiń 100 jyldyǵyn atap ótý sharasy onyń týǵan topyraǵynan bastaý aldy. Sátin salsa, mundai sharalar legi oblystyq, respýblikalyq, tipti halyqaralyq aýqymda atalyp ótýi tiis. Sebebi, Adambekov qazaqqa ǵana emes, tutas túrki álemine ortaq tulǵa. Men jerlesterimdi osyndai dáýir jańǵyratyn sáttiń bastalýymen shyn júrekten quttyqtaimyn», - dedi belgili ádebiettanýshy Qulbek Ergóbek.
Aýmaǵy atshaptyrym demalys ornynda jergilikti klimatqa beiimdelgen úieńki men talshyn, shaǵan men alma syndy aǵashtar otyrǵyzyldy.
Sondai-aq, munda jaily oryndyqtar qoiylyp, kelýshilerdiń demalýyna meilinshe qolaily jaǵdai jasalǵan. Ásirese, jaýyn men ystyq kúnnen qorǵan bolatyn zamanaýi bastyrma astyna úsh jup shahmat taqtasynyń qoiylýy munda ýaqyt ótkizýdiń mán-mazmunyn asha túsetindei.
Al jasyl jelekpen kómkerilip, jaryqshamdardyń ornatylýy saiabaqtyń ajaryn arttyryp, kóz súisindiredi.
Aita keteiik, esimi el esinde qalyp, qurmettelýi tiis tulǵalardyń biri satira sardary – Sadyqbek Adambekov. 1922 jyly 15 qarashada Arys atyrabynda dúniege kelgen ol oralymdy satirasymen oqyrman qaýymdy ózine qaratty.
Sanaly ǵumyryn qazaq satirasynyń damýyna jumsaǵan Sadyqbek Adambekovtiń esimi esimi el ishinde ulyqtalyp, osylaisha jerlesteriniń maqtanyshyna ainaldy.
