QR Premer-Ministri Asqar Mamin Arys qalasyna jumys sapary barysynda jergilikti turǵyndarmen kezdesip, jaǵdailaryn bildi. Qalalyq halyqqa qyzmet kórsetý ortalyǵyn aralaý kezinde Úkimet basshysynan úii tolyqtai órtenip ketken turǵyn kómek surady, dep habarlaidy QazAqparat tilshisi.
Ileshan Myńbaevtyń aitýynsha, jarylys kezinde onyń úiine snariad túsip, jańadan alǵan úsh kóligi men baspanasy, dúkeni men qora jaiy tolyqtai janyp ketken. Osylaisha, kúndelikti tabysynan aiyrylǵan azamattyń úsh qoiy ǵana tiri qalypty. Qazirgi tańda bul otbasy apattan kelgen shyǵyn kólemin 100 mln teńgege baǵalap otyr. Osynshama shyǵynǵa batyp, otbasymen dalada qalǵan arystyq turǵyn kólikteriniń shyǵynyn eshkim ótep bermei jatqanyn aitady. Kólik saqtandyrý kompaniialary men jergilikti bilik shyǵyndardyń ótelmeitinin aitypty.
«Jarylystan 2012, 2013 jáne 2014 jyly shyǵarylǵan úsh kóligim janyp ketti. Sizden kómek suramasaq, basqa jaqtan kómek bolmai tur. Sebebi, saqtandyrý kompaniiasy bas tartyp jatyr. Olar tek jol kólik oqiǵasy kezinde ǵana tóleimiz deidi. Soǵan kómek berseńiz», - dedi Ileshan Myńbaev.
Bul máseleni Úkimet basshysy Asqar Mamin qarastyryp kóretinin atap ótti. Al, arystyq turǵynnyń órtengen úii men dúkenin Shyǵys Qazaqstan oblysy salyp beretinin jetkizdi.
