Túrkistan oblysynda politseige qarsylyq kórsetken turǵyn jaýapqa tartyldy, dep habarlaidy "Ult aqparat" oblystyq politsiia departamentine silteme jasap.
Arys APB politseileri aýdan boiynsha qoǵamdyq tártiptiń saqtalýyn qadaǵalap, túrli qylmystardyń aldyn alý baǵytynda kúndelikti qarqyndy qyzmet atqaryp jatyr.
Osyndai kezekti jumys kúninde ózine bekitilgen aýmaqta qoǵamdyq tártipti saqtap, jol qaýipsizdigin qamtamasyz etip júrgen politsei Arys qalasynyń kósheleriniń birinde jaryq berýshi shamyn jaqpai jáne qaýipsizdik belbeýin taqpai kele jatqan «DAEWOO NEXIA» markaly kóligin toqtatady.
Atalmysh avtokólik júgizýshisiniń qujattaryn tekserý kezinde politseidiń qyzmettik kóliginiń aldyna «TOYOTA CAMRY» kóligi toqtap, ishinen júrgizýshi túsip, politseiden «DAEWOO NEXIA» kóligin ne sebepti toqtatyp turǵanyn surai bastaidy.
Oǵan qosa, politseidiń jumysyna kedergi keltirip, onyń ákimshilik hattama toltyrýyna qarsylyq kórsetedi. Osylaisha turǵyn óz qyzmetin atqarmaq bolǵan tártip saqshysynyń zańdy talaptaryna baǵynbai, dóreki minezin kórsete bastaidy.
Bilik ókiline til tigizip, balaǵat sózdermen qorlap, aýzyna kelgenin aitady. Tártip saqshysy sabyrǵa kelýin suraǵanymen, quqyq buzýshy zańǵa baǵynbai óziniń teris áreketterin jalǵastyra beredi.
Tipti patrýldik politsiia tobynyń inspektoryna kúsh qoldanyp, sebepsiz qol judyryǵymen bas shúidesinen uryp, jaǵasynan alyp, oń jaq mańdai shekesinen basymen soqqy berip, oqiǵa ornynan qashyp ketedi.
Atalǵan jait QR QK 380-baby boiynsha tirkeldi. Politseiler bilik ókiline qarsy kelip, balaǵattap, kúsh qoldanǵan turǵyndy ustaý maqsatynda qajetti sharalardy atqarady.
Quqyq buzýshy turǵyn turǵylyqty mekenjaiynda ustaldy. Ol APB-ne jetkizildi.
Tergeý barysynda anyqtalǵandai, negizinde politsei toqtatyp, ákimshilik hattama toltyrmaq bolǵan kólik quqyq buzýshynyń kóligi bolyp shyqty.
Ol tanysyna kólikti jetkizip berýin ótinip, ózi sońynan kele jatqan. Quqyq buzýshy azamat óziniń kinásin tolyǵymen moiyndady, qamaýǵa alyndy. Qazirgi tańda sotqa deiingi tergeý amaldary júrgizilýde.
