Qorǵanys ministri Nurlan Ermekbaev Arys qalasynda oq-dári qoimalaryndaǵy órt saldaryn joiý jumysyn tekserdi, sondai-aq Qazaqstannyń ońtústiginde ornalasqan áskeri bólimder men mekemelerge baryp qaitty, dep habarlaidy "Ult aqparat" vedomstvonyń baspasóz qyzmetine silteme jasap.
Ministr Nurlan Ermekbaev Arys qalasyndaǵy injenerlik-saperlik qurama jasaqtyń qyzmetine zer saldy. Oǵan oq-dáriler qaldyqtaryn jinaý men olardy kádege jaratý boiynsha júrgizilip jatqan jumystar týraly baiandady.
Jumysqa zamanaýi injenerlik tehnika jumyldyrylady. Atap aitqanda, operator qorǵalǵan pýnktten basqarylatyn «tEODor» robottandyrylǵan kesheni qoldanylady. Robottyń salmaǵy 100 kg deiingi zattardy 2 shaqyrym qashyqqa tasymaldaýǵa qabiletti.
Zamanaýi yńǵaily jáne jeńil basqarylatyn ekskavator mashinalary qoldanylady.
«Oq-dárilerdi jinaý men kádege jaratý ádistemesi únemi jetildirilip otyrady. Búgingi tańda oq-dárilerdi jinaý arnaiy konteinerlerde júzege asyrylady, onda olar belgilengen jerge jetkizilip, joiylady. Bul saperlerdiń oq-dárilermen tikelei bailanysyn azaitýǵa jáne tótenshe jaǵdailardyń paida bolý múmkindigin azaitýǵa múmkindik beredi.
Saperlermen jumys barysynda beinebaqylaý quraldarymen jáne dozimetr aspabymen jaraqtalǵan otandyq óndiristiń «Saqtaý» jinaqqa qarsy qorǵanysh kostiýmderi paidalanylady», delingen habarlamada.
Qalada jáne onyń ainalasynda oq-dári qaldyǵy áli izdelip jatyr. Kóptegen jaǵdai tabylǵan zattar jergilikti turǵyndarǵa qaýip tóndirmeitini atap ótildi.
Áskeri saperler qalaǵa irgeles aýmaqtarda egis naýqanyn qaýipsiz júrgizý men mal jaiýdy qamtamasyz etti. Jergilikti turǵyndar da áskeri qyzmetshilerdiń jumysyna túsinistikpen jáne qoldaýmen qaraityny atap ótildi.
«Sonymen qatar, belgisiz zattardy tapqan kezde áskeri qyzmettiń kúndelikti tynys-tirshiligi men azamattardyń is-qimyl tártibi týraly turǵyndardy habardar etý boiynsha sharalar júzege asyrylýda. Osy maqsatta jergilikti atqarýshy organdar men utqyr minasyzdandyrý toptarynyń ózara tyǵyz is-qimyly uiymdastyrylǵan», delingen habarlamada.
Qorǵanys ministri birqatar tapsyrma berdi. Olardyń kóbi órt saldaryn joiýǵa qatysatyn jergilikti turǵyndar men áskeri qyzmetshilerdiń qaýipsizdigin qamtamasyz etý jóninde boldy.
Túrkistan oblysynda ornalasqan áskeri bólimderde qorǵanys vedomstvosynyń basshysy qarý-jaraq pen oq-dárilerdiń saqtalý jai-kúiin, áskeri obektilerdiń órtke qarsy jáne diversiiaǵa qarsy qaýipsizdik jaǵdaiyn tekserdi.
Qorǵanys ministri sondai-aq, Ońtústik Qazaqstan memlekettik ýniversitetinde baryp, áskeri kafedradaǵy oqý úrdisiniń jai-kúiimen tanysty.
