Arysta kún saiyn myń jarym áskeri qyzmetshi oq-dárilerdiń bólikterin izdeý, zalalsyzdandyrý, tasymaldaý, joiý jumystaryn júrgizip jatyr. Bul týraly QR QK Tyl jáne qarý-jaraq basqarmasynyń bastyǵy Asylbek Satybaldinov málim etti, dep habarlaidy QazAqparat.
«Jarylys qaýpi bar fragmentterdi joiý jumystarynyń basym bóligi Arys qalasynan 50 shaqyrym jerdegi - Bastarma poligonynda atqarylýda. Azamattyq ortaǵa oq-dárilerdiń urlyǵy arqyly enip ketýin, túrli-tústi metall synyǵynyń satylýyn aldyn alý maqsatynda profilaktikalyq reidter turaqty túrde uiymdastyrylady. Ýtilizatsiia ornynda jinaqtalǵan oq-dáriler táýlik boiy kúzetiledi», - deidi Asylbek Satybaldinov OKQ-da ótken baspasóz máslihatynda.
Onyń aitýynsha azamattyq tulǵalardyń jinaqtalǵan oq-dáriler ornyna kirip ketý jaǵdaiy da tirkelgen.
«Tártipti qadaǵalaý úshin ishki ister organdarymen birge táýlik boiy kóshelerde patrýl júrgiziledi. Sonymen birge áskeri qyzmetshiler qurylys pen qalpyna keltirý jumysyna belsene atsalysyp, koronavirýs infektsiiasyna qarsy dezinfektsiia jumystaryn atqardy. Mobildi dalalyq emhananyń dárigerleri myńǵa tarta azamatqa ártúrli meditsinalyq kómek kórsetti. Áskeri veterinarlar Aýyl sharýashylyǵy ministrliginiń mamandarymen birge 508 bas úi janýaryn dalaǵa kómdi. 9 myń sharshy metr aýmaqtaǵy ólgen maldyń oryndary dezinfektsiialandy. Kún saiyn myń jarym áskeri qyzmetshi oq-dárilerdiń bólikterin izdeý, zalalsyzdandyrý, tasymaldaý, joiý jumystaryn júrgizýde», - dedi ol.
