Túrkistan oblysynda bir otbasynyń 7 múshesi qaýipti indetten aiyǵyp shyqty. Arys aýdanynyń turǵyndary aldaǵy ýaqytta úi karantininde dárigerlerdiń qadaǵalaýynda bolady, dep habarlaidy "Ult aqparat".
Oblystyq tótenshe jaǵdai shtabynyń sońǵy málimetine sai, Arys qalasynda «Naýryz» móltek aýdany men oǵan irgeles eldi mekende karantin jariialanǵan bolatyn. Shuǵyl túrde aýrýdy aýyzdyqtaý sharasynyń arqasynda 3 myńnan astam halyq 4 saǵattyń ishinde tolyq meditsinalyq tekserýden ótken. Osylaisha qaýipti indettiń basqa aimaqtarǵa taralýyna tosqaýyl qoiylǵan. 40 meditsina qyzmetkeri qaýipsizdik sharalaryn qadaǵalai otyryp, turǵyndardyń dene qyzýyn ólshep otyrǵan. Olardy tekserýden ótkizgen. Koronavirýs infektsiiasynyń oshaǵyna ainalǵan aimaqta táýlik boiy qyzmet kórsetetin meditsinalyq tirek beketteri ornatylǵan.
Turǵyndar alysqa barmai-aq, úileriniń janyndaǵy dáriger kómegine júginip kelgen. Barlyq maǵlumattar shtabqa habarlanyp, shuǵyl ári kásibi júrgizilgen jumystyń arqasynda aýrý basqa jaqqa taraǵan joq.
Jalpy, aýdan boiynsha dertke shaldyqqan 17 naýqas tirkelgen. Olardyń 14-i jazylyp shyqqan. Jaqyn jáne yqtimal qarym-qatynasta bolǵan 28 adamnan da synama alynyp, teris nátije berýine orai úilerine qaitarylǵan.
Otbasymen qaita qaýyshqan azamattar aq halatty jandarǵa alǵystaryn bildirýde.
