Qorǵanys ministriniń birinshi orynbasary Murat Bektanov Arysta qaza tapqan áskeri qyzmetker týraly aitty, dep habarlaidy Sputnik Qazaqstan.
"Jarylys bastalǵanda bizdiń áskeri qyzmetkerlerimiz órt sóndirýdi jalǵastyra bergen. Olar tankterdiń kómegimen №2 jáne №3 tehnikalyq aimaqtaǵy órtti óz kúshimen sóndirip úlgerdi. Al qaza tapqan jigit birneshe jyl áskeri qyzmet atqardy. Ol órt sóndirý kezinde qaza tapqan siiaqty. Qazir biz osy jaǵdaidy jan-jaqty anyqtap jatyrmyz. Áskeri qyzmetker kelisimshartpen jumys istegen", - dedi Bektanov jýrnalisterge bergen suhbatynda.
Arys qalasyna kesheden beri shamamen 500 saper tartyldy. Budan bólek, arnaiy tehnika bar. Aldymen Arys qalasyna jaqyn mańdaǵy áskeri oq-dárilerdi shyǵarý mindeti qoiyldy.
"Búginnen bastap taǵy 1800 adam jiberilip otyr. Olar snariadtar ushqan jerlerdi zerdeleidi. Sondai-aq, tótenshe jaǵdaidyń saldaryn joiý jumystaryna atsalysady. Áskeri politsiia da patrýlge shyǵyp júr", - dedi Bektanov.
Onyń aitýynsha, áskeri qoimada san alýan snariad saqtalǵan. Sonyń ishinde artilleriialyq oq-dáriler de bar. Áýe qorǵanysyna arnalǵan snariadtar bolmaǵan. Búginde áskeri qoimany basqa jerge kóshirý jaily sheshim qabyldanyp otyr.
"Áskeri qoimalar qalaǵa jaqyn jerde ornalasqan. 200 metrge deiingi aralyqta da bar. Negizi, ereje boiynsha áskeri qoimalar úsh shaqyrym shalǵai jerde ornalasýy qajet. Biz birneshe ret ol aralyqty 10 shaqyrymqa jetkizýge qatysty usynys jasadyq. Biraq ol úshin adamdardy basqa jerge kóshirý kerek. Temirjol jelisi de ótedi. Ony da aýystyrý qajet. Osyǵan bailanysty áskeri qoimany basqa jerge kóshirý týraly sheshim qabyldandy", - dep atap kórsetti Bektanov.
Ishki ister vitse-ministri Iýrii Ilin Arystaǵy jarylys kezinde snariadtardyń kólikter men úilerge qalai túskenin aityp berdi.
"Negizi, ondai jarylystar kezinde áskeri snariad jarylmasa da, birneshe shaqyrym jerge usha alady. Arysta qaza tapqan adam shamamen bir shaqyrym shalǵai jerde júrgen. Men ózim oqiǵa ornynda bolǵan joqpyn. Ony sarapshylar anyqtaidy. Biraq ol adamnyń qatty jaraqattan kóz jumǵany belgili. Al áskeri adam qoimalardyń janynda boldy", - dedi Ilin jýrnalisterge bergen suhbatynda.
Onyń aitýynsha, áskeri qyzmetker jarylǵan snariadtyń jaryqshaǵynan qaza tapqan. Al ekinshi adamnyń qalai qaza tapqany ázirge belgisiz. Sebebi áskeri qoimadan ushqan snariadtar jarylmaýy da múmkin.
"Negizi, órt bolǵanda snariadtar sol jerde jarylady nemese tutanǵannan keiin ushyp ketedi. Máselen, jáshikte jatqan bir snariad jarylsa, onyń janynda jatqan oq-dáriler jan-jaqqa ushady. Bireýi jarylady, endi bireýi jarylmaýy da múmkin", - deidi Ilin.
Resmi málimetke sáikes, kesheden beri Arys qalasynda 19 úi men 9 sharýashylyq nysan órtendi. Ilinniń sózine qaraǵanda, buǵan snariadtardyń jarylýy sebep bolǵan.
"Qazirgi kezde eń qatty jarylystar artta qaldy deýge bolady. Qaýiptiń beti qaita bastady", - dedi Ilin.
