Arys qalasy boiynsha 2022 jyldyń 9 aiynda jalpy óńirlik ónim kólemi 23,7 mlrd teńgeni qurap, ótken jyldyń tiisti kezeńimen salystyrǵanda 9,6 mlrd. teńgege artyp otyr. Bul týraly óńirlik kommýnikatsiialar qyzmetinde ótken brifingte Arys qalasynyń ákimi Gúljan Qurmanbekova málimdedi.
«Arys qalasynda 2022 jyldyń 9 aiynda ónerkásip ónim kólemi esepti kezeńde 4 mlrd. 942,7 mln. teńgege jetti. Al negizgi kapitalǵa tartylǵan jalpy investitsiia kólemi 11 mlrd. 900 mln. teńgeni qurap, ósim boiynsha oblys boiynsha kósh bastadyq. Sonymen qatar, aýyl sharýashylyǵy óniminiń jalpy kólemi 17 mlrd. 130,2 mln teńgeni qurady. Biyl 9 aidyń qorytyndysy boiynsha 3 159 adam jumyspen qamtý sharalaryna qatysty», - dedi Gúljan Mamytqyzy.
Budan ózge, Arys qalasyndaǵy qurylys jumystarynyń jalpy kólemi 2 mlrd. 265,7 mln. teńgeni qurap, ótken jylmen salystyrǵanda 2,9 paiyzǵa artqan. Turǵyn úi qurylysyna baǵyttalǵan investitsiia 1 mlrd 360,3 mln. teńgeni qurap otyr. Biyl qala boiynsha 10 486 sharshy metr turǵyn úi paidalanýǵa berildi.
Ákimniń aitýynsha, 2023 jyly qala aýmaǵynda jylyna 50 myń tonna munai ónimderin óńdeitin zaýyt iske qosylady. Jobanyń jalpy quny - 11 mlrd teńge. Jańa óndiris ornynda 112 adam jumyspen qamtylady dep josparlanyp otyr.
Aita keterligi, aimaqta jumys istep turǵan apatty jáne úsh aýysymdy mektepter joq.
