Arys qalasyn úsh kezeńmen tolyq gazdandyrý josparlanǵan. Búgin shahardaǵy «Alataý» turǵyn alabyndaǵy úilerge tabiǵi gaz berildi, dep habarlaidy «Ult aqparat» oblys ákimdiginiń baspasóz qyzmetine silteme jasap.
Qala ákimi Gúljan Qurmanbekova turǵyndardyń qýanyshyna ortaqtasty. Búgingi tańda Arys qalasyn tabiǵi gazǵa qosý úshin Ordabasy aýdanyndaǵy №19 «Temirlan» AGTS-nan Arys qalasyna deiin 41,2 shaqyrym gaz qubyry tartyldy. Sondai-aq, qalany tabiǵi gazben qamtamasyz etý úshin 15,6 shaqyrym jetkizgish gaz qubyry júrgizilip, 6 dana gazdy retteý pýnkti (GRP) ornatylyp, qysymdaý jumystary júrgizildi.
Turǵyndar qýanyshtarymen bólisti. Solardyń biri – Dosan Jienbai qariia: «Úige gaz kirip, qýanyp jatyrmyz. Endi gaz mamandary úi jylytatyn peshimizdi gazǵa jalǵap beremiz dep jatyr. Mundai qýanysh ózge de jerlesimizge juǵysty bolsyn. Qujattardy rásimdeýdi tezdetip, barlyq arystyqtar gazdyń igiligin kóre bersin», – deidi.
Aita keteiik, «Alataý» turǵyn alabynda gazǵa qosylýy tiis 185 turǵyn úi tirkelgen. Qazirgi kezde atalǵan aýmaqtaǵy úilerdiń qujattaryn rásimdeý jumystary júrgizilýde. Ol úshin árbir úi iesi talapqa sai saqtyq sharalaryn qamtamasyz ete otyryp, gaz kirgizýmen ainalysatyn kompaniiamen kelisimshart túzýi tiis.
