Búgin Arys qalasyna Jambyl oblystyq máslihatynyń hatshysy Baǵlan Qarasholaqov bastaǵan máslihat depýtattary, Qoǵamdyq jáne Aqsaqaldar keńesiniń tóraǵalary men músheleri arnaiy kelip, qalany qalpyna keltirý sharalarymen tanysty, dep habarlaidy QazAqparat.
Olar tótenshe jaǵdaidyń zardaptaryn joiý boiynsha oblys shtabynyń jumystaryn kózben kórip, óńirge tiesili 3-sektordaǵy qurylys barysyn jan-jaqty barlady. Sondai-aq, sapar barysynda halyq qalaýlylary jergilikti turǵyndarmen kezdesip, hal-jaǵdai surasyp, mal soiyp, qudaiy taratty.
Aita keteiik, búginde Arys qalasyn qalpyna keltirý sharalary qarqyndy atqarylýda desek, ondaǵy jambyldyq qurylysshylardyń jumysy jemisti deýge tolyq negiz bar. Nátijesinde, búginde oblysqa tiesili bólinistegi 190 jeke turǵyn úidi tolyǵymen jóndep, paidalanýǵa berip úlgerdi. Al, 120 úi boiynsha qalpyna keltirý jumystary úzdiksiz júrgizilýde. Onda 4 merdiger mekemeniń 500-den astam qurylysshysy eńbek etýde. Barlyǵy 20-dan astam tehnika jumyldyrylǵan.
Eske sala keteiik, Arys qalasyn qalpyna keltirýge baǵyttalǵan Jambyl oblysynyń shtabyna qarasty 3-sektorǵa 11 kóshe bekitilgen. Onda 312 jeke turǵyn úimen birge 14 áleýmettik jáne kommertsiialyq nysan bary anyqtalǵan. Zerdeleýden ótken jeke turǵyn úidiń barlyǵynyń aqaý aktileri toltyrylyp, smetalaý jumystary jasalǵan. Qiraǵan 3 úidiń ekeýi basynan boi kóterip, bireýi tolyq jańǵyrtylatyn bolady. Qalǵan úilerge kúrdeli jóndeý jumystaryn júrgizý josparlanǵan.
