بٷگٸن ارىس قالاسىنا جامبىل وبلىستىق مەسليحاتىنىڭ حاتشىسى باعلان قاراشولاقوۆ باستاعان مەسليحات دەپۋتاتتارى, قوعامدىق جەنە اقساقالدار كەڭەسٸنٸڭ تٶراعالارى مەن مٷشەلەرٸ ارنايى كەلٸپ, قالانى قالپىنا كەلتٸرۋ شارالارىمەن تانىستى, دەپ حابارلايدى قازاقپارات.
ولار تٶتەنشە جاعدايدىڭ زارداپتارىن جويۋ بويىنشا وبلىس شتابىنىڭ جۇمىستارىن كٶزبەن كٶرٸپ, ٶڭٸرگە تيەسٸلٸ 3-سەكتورداعى قۇرىلىس بارىسىن جان-جاقتى بارلادى. سونداي-اق, ساپار بارىسىندا حالىق قالاۋلىلارى جەرگٸلٸكتٸ تۇرعىندارمەن كەزدەسٸپ, حال-جاعداي سۇراسىپ, مال سويىپ, قۇدايى تاراتتى.
ايتا كەتەيٸك, بٷگٸندە ارىس قالاسىن قالپىنا كەلتٸرۋ شارالارى قارقىندى اتقارىلۋدا دەسەك, ونداعى جامبىلدىق قۇرىلىسشىلاردىڭ جۇمىسى جەمٸستٸ دەۋگە تولىق نەگٸز بار. نەتيجەسٸندە, بٷگٸندە وبلىسقا تيەسٸلٸ بٶلٸنٸستەگٸ 190 جەكە تۇرعىن ٷيدٸ تولىعىمەن جٶندەپ, پايدالانۋعا بەرٸپ ٷلگەردٸ. ال, 120 ٷي بويىنشا قالپىنا كەلتٸرۋ جۇمىستارى ٷزدٸكسٸز جٷرگٸزٸلۋدە. وندا 4 مەردٸگەر مەكەمەنٸڭ 500-دەن استام قۇرىلىسشىسى ەڭبەك ەتۋدە. بارلىعى 20-دان استام تەحنيكا جۇمىلدىرىلعان.
ەسكە سالا كەتەيٸك, ارىس قالاسىن قالپىنا كەلتٸرۋگە باعىتتالعان جامبىل وبلىسىنىڭ شتابىنا قاراستى 3-سەكتورعا 11 كٶشە بەكٸتٸلگەن. وندا 312 جەكە تۇرعىن ٷيمەن بٸرگە 14 ەلەۋمەتتٸك جەنە كوممەرتسييالىق نىسان بارى انىقتالعان. زەردەلەۋدەن ٶتكەن جەكە تۇرعىن ٷيدٸڭ بارلىعىنىڭ اقاۋ اكتٸلەرٸ تولتىرىلىپ, سمەتالاۋ جۇمىستارى جاسالعان. قيراعان 3 ٷيدٸڭ ەكەۋٸ باسىنان بوي كٶتەرٸپ, بٸرەۋٸ تولىق جاڭعىرتىلاتىن بولادى. قالعان ٷيلەرگە كٷردەلٸ جٶندەۋ جۇمىستارىن جٷرگٸزۋ جوسپارلانعان.
