Jarylys bolǵan Arys qalasynyń turǵyndary búgin jappai úilerine oralyp jatyr. Kútpegen jerden tótenshe jaǵdaiǵa tap bolǵan jurtty qazir qandai máseleler mazalaityny belgili boldy, dep habarlaidy QazAqparat tilshisi.
Arys qalasynyń turǵyny Ainur Muratbekovanyń aitýynsha, ony eń aldymen baspanasynyń jaǵdaiy mazalaidy.
«Úiimniń esigi men terezesi synǵanyn bildim, bireýlerdiń úii órtenip ketken dep jatyr. Ortasyna túsp ketken dep aitylýda. Úiden qashqanda qujattarymdy da alyp úlgermegen edim, onyń da bar-joqtyǵyn bilmei turmyn. Qaltamda azyn aýlaq bolsa da qarajatym joq. Barǵanda tym bolmasa as aýqat alý da muń bolyp tur. Buryn áskeri bólimde jumys isteitin edim, keiin qysqartyp jiberdi. Toihanaǵa jumysqa turǵan em, olar da qirap jatyr dep estidim. Soǵan qaraǵanda jaqyn arada jumysym da bolmaityn siiaqty. Úide jalǵyz ózim turatyndyqtan senetin adamym da bolmai tur», - deidi Ainur Muratbekova.
Al, Jansulý Baimahanova óziniń balalaryna alańdap otyrǵanyn aitady. Olarǵa as aýqat taýyp berý, jatatyn oryn tabý jaǵy jas kelinshekke qiyndyq týǵyzyp otyr eken.
«Bizdiń úiimiz áskeri bólimge jaqyn jerge ornalasqan. Inim baryp kórgen eken, qirap qalypty. Dýaldary kóship, terezeleri synyp ketipti. Basqa baratyn jerimiz joq. Onyń ústine aqsham da joq. Kishkentai sábiime tamaq taýyp berýim kerek», - deidi Jansulý Baimahanova.
82 jastaǵy qariia Myrzaly Siqymbaevty da baspana máselesi mazalaidy. Zeinetkerdiń aitýynsha, jarylys bolǵanda Shymkenttegi týystaryn panalap ketken. Alaida segiz jan bir úige syimaǵandyqtan, ár kúni ár týysynyń úiinde túnegen. Búgin kóshirip jatyr degen sońǵ Arysqa jetýge asyǵyp otyr.
«Bárimiz toqyrlap ár úide qashanǵy jatamyz. Keteiik dedim Arysqa. Búgin býynyp-túiinip jolǵa shyqtyq bala-shaǵamyzben. Úiimiz qandai bolsa da tazalap, kirip alamyz. Kómek bolsa boldy, bolmasa amaldaimyz da», - deidi qariia.
