Arys qalasynyń ákimi Gúljan Qurmanbekova Dermene aýylynyń irgesindegi Arys ózeniniń jieginde jumys istei bastaǵan «DERMENE AGRO GROUP» JShS-niń jumys-jaiymen tanysty, dep habarlaidy «Ult aqparat» oblys ákimdiginiń baspasóz qyzmetine silteme jasap.
Qala ákimi óńirde balyq ósirý sharýashylyǵy órkendep kele jatqanyn aitady.
Eni – 7, uzyndyǵy – 26, al tereńdigi – 2 metr bolatyn 6 sý basseiininde 30 myńnan astam sazan tuqymdas shabaq ósirip otyrǵan dermenelik kásipker Maqsat Toqbolaev 3 jyldan beri osy kásipke den qoiǵan. 5-6 aidan keiin óz ónimin naryqqa shyǵaratyn ol jergilikti úsh azamatty turaqty jumyspen qamtyǵan.
Bas-aiaǵy 40 million teńge qarjysyn týǵan jerine investitsiia retinde quiǵan azamat atalǵan nysanǵa sońǵy shabaqty salý sharasyna qala ákimin arnaiy shaqyrǵan. Óitkeni, kásibiniń dóńgeleýine belgili bir deńgeide jergilikti ákimdik tarapynan tiisti deńgeide kómek-keńester alyp otyrady.
«Osylaisha, ózara yntymaqtasa otyryp, el ekonomikasyn jaqsartyp, turmys-tirshiligimizdi túzeimiz degen senimdemin», – deidi kásipker Maqsat Rahymjanuly.
Al qala ákimi Gúljan Mamytqyzy sońǵy ýaqytta Arys óńirinde balyq ósirý salasy keń óris alyp kele jatqanyn atap ótti. Onyń aitýynsha, tájiribelik turǵyda jáne ózge de baǵyttarda kásipkerlerge jergilikti ákimdik tarapynan tiisti deńgeide kómekter uiymdastyrylýda.
Osy kúngi salmaǵy ortasha eseppen 72 grammdy quraityn shabaq sátin salsa 5-6 aidan soń, 2-2,5 kilogrammǵa deiin ósip, jetiledi. Al ony ótkizý jaǵy qazirdiń ózinde sheshilgen. Almaty qalasyndaǵy balyq taratý naryǵynyń 70-80 paiyzyn qamtamasyz etetetin bir kompaniia dermenelik balyqtyń kilogrammyn 2-2,5 myń teńge shamasynda satyp alatyn bolyp usynys bildirip otyr.
Jaqyn kúnderi kásipker sý astyn ottegimen qamtamasyz etetin arnaiy aeroatorlar ornatsaq deidi.
«Óitkeni, qys mezgilinde sý betine muz qatyp, sýdyń quramyndaǵy ottegi tómendeýi múmkin. Onyń ústine aýa temparetýrasy +10 gradýstan tómen túsken jaǵdaida balyq uiqyǵa ketip, qozǵalysy baiaýlaidy. Ol kezde onyń ósý protsesi de qarqyndy bolmaidy», – deidi Maqsat Rahymjanuly.
Búginde kásipker basseiin aýmaǵyndaǵy qaýipsizdikti qamtamasyz etý úshin tikelei telefonnan baqylaý júrgizetin beinebaqylaý kameralaryn ornatqan. Ozyq tehnologiiany ońai meńgerýdi maqsat etken kásipker keleshekte balyq basseiinin keńeitýmen qatar, ýyldyryq alý men dernásilderdi shabaq kúiine deiin ósirýdi de qolǵa alýdy kózdep otyr.
