QR QK Tyl jáne qarý-jaraq basqarmasynyń bastyǵy Asylbek Satybaldinov Arys qalasyndaǵy tótenshe jaǵdaidyń saldaryn joiýdyń jyldyq jumysynyń qorytyndysyn baian etti, dep habarlaidy "Ult aqparat".
«Arys qalasyndaǵy áskeri qoimada bolǵan oq-dárilerdiń jarylysynan beri bir jyl ótti. Búgingi tańda jaǵdai baqylaýda. Sonymen qatar infraqurylym 90 paiyzǵa qalpyna keltirildi. Áskeri qyzmetshilerdiń sheber jáne jedel túrdegi áriptestiginiń arqasynda odan da aýqymdy oqiǵalardyń aldyn aldyq», - deidi Asylbek Satybaldinov OKQ-da ótken baspasóz máslihatynda.
Onyń aitýynsha jyl boiy óńirde tótenshe jaǵdaidyń saldaryn joiýǵa jumsalǵan qosyndy otriad jumys istep keledi. Ai saiyn saperlar men basqa da áskeri mamandar rotatsiiaǵa sáikes jumys júrgizýde.
«Izdeý toptary, injenerlik barlaý men minasyzdandyrý toptary 300 sharshy shaqyrymdy barlap, tekserip shyqty. Onyń ishinde egin aýmaqtary da, jaqyn mańdaǵy eldimekender de bar. Mobildi jáne izdeýshi saperlik toptar jergilikti halyqtan túsken 740-qa jýyq ótinim boiynsha jumysty aiaqtady. Osynyń arqasynda oq-dárilerdiń 4,5 myń fragmentti zalalsyzdandyryldy. Vodolazdar Arys ózeniniń 30 shaqyrymdyq arnasyn tazartty. Jarylys bolǵan aýmaq aýdany 500 gektar jerdi quraidy. 130 gektar aýmaqta betki tazartý jumystary júrgizildi», - dedi ol.
Sondai-aq áýeden baqylaý júrgizip, eldimekenderde ornalasqan qoimalardy monitringteý úshin ushqyshsyz ushatyn apparattar men kvadrokopterler qoldanylǵan. Saperlar oq-dárilerdiń 2,5 myń tonnalyq fragmentin jinap alǵan.
«Jarylatyn qaýpi joq fragmentter qaýiptiń aldyn alý úshin ashyq alańǵa jinalady. Arystan oq-dárilerdiń 380 myń fragmenti áketildi. Onyń 330 myńy jarylys qaýpi barlary. Olardy tasymaldaý úshin áskeri qaraýyldyń birge júrýimen 5 myń avtokólik reisi oryndaldy», - dedi ol.
