QR Tótenshe jaǵdai komitetiniń tóraǵasy Vladimir Bekker Arysta áli de 1300-ge jýyq saper jumys istep jatqanyn aitty, dep habarlaidy QazAqparat tilshisi.
Ortalyq kommýnikatsiialar qyzmetinde ótken brifingte Vladimir Bekker temirjol boiynan jarylmaǵan snariad tabylǵanyn aitty.
«Saperlik bólimshelerden 1287 adam 80 topqa bólinip, Arys aýmaǵyn tazartyp jatyr. Búginge deiin 11 400 oq-dári men bólshek tabylǵan. Qalanyń birneshe jerinde órt bolǵanyn bilesizder. Sondyqtan beisaýat snariadtardyń jarylý qaýpi tómen. Olai eken dep saqtyqty joǵaltýǵa bolmaidy. Arystyqtarǵa snariad bólshekter kezdesse, ne isteý kerektigi jappai túsindirildi», - deidi komitet tóraǵasy.
Sondai-aq, ol saperlik jumystar kezinde temirjol boiynan tabylǵan jarylǵysh zattyń iske qosylǵan qalpy jarylmai qalǵanyn aitty.
«Temirjol toraptaryn tazartý kezinde mamandar jarylmaǵan snariad taýyp aldy. Jarylmady degenińiz bomasa, ózdiginen iske qosylyp qalǵan. Muny kórgen saperlardyń ózderi de qatty tańǵaldy», - dedi Vladimir Bekker.
Eske salsaq, QR Qorǵanys ministrligi keshe Arys qalasynda jarylý qaýpi joq qarý-jaraq bólshekterin joiý jumystaryn bastaǵan bolatyn.
Buǵan deiin Túrkistan oblysy ákiminiń orynbasary Joldymurat Amanbaev apattan zardap shekken Arys turǵyndarynyń árqaisyna 100 myń teńgeden tóleý úshin eki aptanyń ishinde 44 myńnan asa adam týraly málimet jinalatynyn aitqan bolatyn. Búgingi tańda búlingen 247 jeke úi jóndelýde.
